Welker gæti yfirgefið Patriots

Það er mikið líf á leikmannamarkaðnum í NFL-deildinni þessa dagana og eitthvað af stjörnum sem munu hafa vistaskipti. Einn heitasti bitinn á markaðnum er hinn magnaði útherji New England Patriots, Wes Welker.

Hinn 31 árs gamli Welker hefur verið algjör lykilmaður hjá Patriots undanfarin ár og verið sá maður sem leikstjórnandinn, Tom Brady, kastar oftast á. Enginn útherji í sögu Patriots hefur skilað eins mörgum metrum og Welker.

Brady skrifaði undir nýjan samning við Patriots um daginn og vonaðist eftir því að Welker myndi gera slíkt hið sama. Welker ætlar að skoða alla sína möguleika áður sem kemur nokkuð á óvart enda héldu margir að hann yrði fljótur að feta í fótspor vinar síns Brady.

Welker ætlar að nýta sér sína stöðu og skoða hvaða valmöguleikar eru í boði. Þegar hann er búinn að því mun hann taka ákvörðun um framtíð sína sem gæti allt eins legið áfram hjá Patriots.