Valur vann fyrir norðan

Tveir leikir fóru fram í Lengjubikar karla í dag. Valsmenn gerðu góða ferð norður til Akureyrar þar sem þeir unnu 4-0 sigur á Völsungi í Boganum.

Matarr Jobe, Arnar Sveinn Geirsson, Þórir Guðjónsson og Kristinn Freyr Sigurðsson skoruðu mörk Valsmanna í leiknum. Valur komst með sigrinum á topp 2. riðils en liðið er með tólf stig að loknum fimm leikjum. Völsungur er í neðsta sæti með eitt stig eftir þrjá leiki.

Þá gerðu Haukar og KF jafntefli, 3-3. Hilmar Geir Eiðsson, Guðmundur Sævarsson og Magnús Páll Gunnarsson skoruðu mörk Hauka en Kristinn Þór Rósbergsson skoraði tvö marka KF og Teitur Pétursson eitt.

Þessi tvö lið eru í tveimur neðstu sætum 3. riðils Lengjubikarsins. Haukar eru með þrjú stig eftir sex leiki en þetta var fyrsta stig KF sem hefur spilað þrjá leiki.

Upplýsingar um markaskorara frá Fótbolta.net.