Tebow áhrifamesti íþróttamaðurinn

Leikstjórnandinn Tim Tebow spilaði nánast ekkert í fyrra og er án félags í dag. Hann er engu að síður áhrifamesti íþróttamaður heims samkvæmt könnun Forbes.

Tebow fékk 29 prósent atkvæða í könnuninni en sundkappinn Michael Phelps varð í öðru sæti með 25 prósent atkvæða.

Spretthlauparinn Usain Bolt kom þar á eftir með 23 prósent og hafnaboltakappinn Derek Jeter þar rétt á eftir með 22 prósent atkvæða. Peyton Manning varð í fimmta sæti.

Enginn knattspyrnumaður kemst á listann en Bandaríkjamenn sáu aðallega um að greiða atkvæði í könnuninni.