Aníta bætti Íslandsmetið í 800 metrum

Aníta Hinriksdóttir úr ÍR bætti í dag Íslandsmet sitt í 800 metra hlaupi kvenna á móti í Mannheim. Hún kom í mark á 2:00,49 og nálgast tveggja mínútna markið óðfluga.

Aníta bætti viku gamalt met sitt sem var 2:01,17 þegar hún vann hlaupið í Mannheim sannfærandi.

Aníta tók forystu í hlaupinu eftir um 200 metra og leiddi það allt til loka. Christian Herring frá Þýskalandi var önnur á 2:03,94 mínútum.

Aníta bætti Íslandsmetið í 800 metra hlaupi kvenna fyrst á þessu sama móti fyrir ári síðan en metið var þá 29 ára gamalt. Síðan þá hefur hún bætt metið um rúmar 4 sekúndur.