ÍR bikarmeistari í frjálsum

ÍR-ingar sigruðu í 48. bikarkeppni FRÍ, bæði í karla- og kvennaflokki og þar að leiðandi í heildarstigakeppninni einnig. Þeir hlutu samtals 174,5 stig. FH varð í öðru sæti með 166 stig og lið Norðlendinga í því þriðja með 150 stig. HSK var með 120,5 stig og Breiðablik með 118 stig í 5. sæti.

 

Jafnt var í stigakeppninni lengi framan af degi og skiptust þrjú efstu liðið á forystu í stigakeppninni, bæði í karla- og kvennaflokki. Úrhellisrigning setti strik í reikninginn undir lok keppninnar, en lengst af var gott keppnisveður.

Sandra Pétursdóttir úr ÍR sigraði í sleggjukasti og náði besta árangri ársins í greininni þegar hún sigraði með kasti upp á 51,75 m. Hilmar Örn Jónsson ÍR náði einnig góðum árangri með 7.26 kg sleggjunni, 58,38 metra, en hann er aðeins 17 ára og keppt er með 6 kg sleggju í hans aldursflokki.

 

Kári Steinn Karlsson Breiðabliki sigraði örugglega á næst besta tíma ársins í 5.000 metra hlaupi, en hann kom í mark á tímanum 15:01,75 mín. Þorbergur Ingi Jónsson úr liði Norðurlands var annar á 15:,05 mín. Ármann Eydal Albertsson ÍR kom í mark þriðji á persónulegu meti 15:33,80 mín.

 

Hafdís Sigurðardóttir var sem fyrr atkvæðamikil fyrir sitt lið, sigraði bæði í 200 metra hlaupi og langstökki, en varð fjórða í sleggjukasti, ásamt því að hlaupa síðasta sprett Norðlendinga í boðhlaupi dagsins. Guðmundur H. Guðmundsson FH sigraði nokkuð óvænt í 110 metra grindarhlaupi á persónulegu meti, 15,85 sek.

 

Boðhlaupssveitir ÍR undirstrikuðu sigur í Bikarkeppninni með tvöföldum sigrum í 1000 metra boðhlaupi, báðar á besta tíma ársins í greininni.