Handtekinn átta sinnum á átta árum

Adam "Pacman" Jones, leikmaður Cincinnati Bengals í NFL-deildinni, er duglegastur allra í deildinni að leita uppi vandræði. Hann var handtekinn enn eina ferðina í gær.

Að þessu sinni var hann með dólg og leiðindi í bíl sem var stöðvaður fyrir of hraðan akstur. Hegðun Pacman leiddi til þess að honum var stungið í steininn sem og félaga hans. Ökumaðurinn er grunaður um ölvun við akstur en hann vildi ekki blása í áfengismæli er lögreglan bað hann um það.

Þetta er önnur handtaka Pacman í ár en hann var einnig handtekinn í sumar fyrir að slá konu á bar. Það mál fer fyrir dómstóla í byrjun næsta mánaðar.

Handtakan í gær er í það minnsta sú áttunda síðan Pacman byrjaði að spila í deildinni árið 2005. Hann var þess utan í banni alla leiktíðina 2007.