Sannleikurinn mun jarða þig

Eitt stærsta fréttamál síðasta árs í bandaríska íþróttaheiminum var frétt um meint einelti í búningsklefa NFL-liðsins Miami Dolphins.

Richie Incognito var þá sakaður um að hafa farið frekar illa með liðsfélaga sinn, Jonathan Martin. Martin hætti að leika með liðinu á miðju tímabili og Incognito var svo settur í tímabundið bann á meðan málið var rannsakað.

Incognito fór algjörlega hamförum á Twitter í gærkvöldi. Raðtísti um málið og sagði Martin vera að ljúga: "Sannleikurinn mun jarða þig," sagði Incognito við Martin.

Hann tísti einnig um að Martin hefði trúað sér fyrir því að hann ætlaði að fyrirfara sér í fyrra þar sem hann væri að spila svo illa. Incognito tísti einnig að þeir hefðu verið vinir. Hann væri ekki sekur um annað en að vera góður vinur.

Skýrsla sem unnin hefur verið um málið verður væntanlega birt í næstu viku.