Tvö Íslandsmet féllu í Sviss

Frjálsíþróttakapparnir Arnar Helgi Lárusson og Helgi Sveinsson settu báðir ný Íslandsmet á móti sem er haldið í Sviss um helgina.

Arnar Helgi hafnaði í 44. sæti í keppni í 200m hjólastólaakstri. Hann kom í mark á 34,55 sekúndum og setti um leið nýtt Íslandsmet.

Helgi varð hlutskarpastur í spjótkastskeppninni í öllum flokkum. Besta kastið hans Helga taldi 51,83 metra sem er næstum því meter lengra en kastið (50,98 m) sem tryggði honum heimsmeistaratitilinn í flokki F42 (flokki aflimaðra)síðastliðið sumar.