Ásdís keppir í New York í júní

Spjótkastarinn Ásdís Hjálmsdóttir úr Ármanni mun taka þátt í sjötta demantamóti ársins sem haldið verður í New York 14. júní. Ásdís fékk tilboð þess efnis í gær. Morgunblaðið greindi frá þessu í  morgun.

Ásdís afþakkaði fyrr á árinu boð um að taka þátt í demantamótinu í Doha í Katar keppt var á í gær en þurfti að afþakka boðið því það passaði ekki inn í dagskrána hjá henni.

„Mér líst mjög vel á þetta mót og er bara spennt fyrir þessu. Þetta er í þriðja skiptið í röð sem ég fer á mótið í New York og þetta er skemmtilegt mót. Svo þetta er spennandi verkefni og smellpassar í planið hjá mér,“ sagði Ásdís við Morgunblaðið í gær.

Ásdís keppir á sínu fyrsta móti á tímabilinu um næstu helgi þegar hún kastar spjótinu á alþjóðplegu móti í Halle í Þýskalandi.