Ísland sendir þrjá fulltrúa á Evrópumeistaramót fatlaðra í frjálsum íþróttum

Ísland sendir þrjá fulltrúa á Evrópumeistaramót fatlaðra í frjálsum íþróttum í sumar sem fer fram í Swansea í Wales dagana 18-23 ágúst næstkomandi. Keppendurnir eru þeir Helgi Sveinsson úr Ármanni, Matthildur Ylfa Þorsteinsdóttir úr ÍFR og Arnar Helgi Lárusson úr Nes.

Helgi er ríkjandi heimsmeistari í spjótkasti í flokki F42 en hann bætti Íslandsmetið sitt í greininni í Sviss í maí þegar hann kastaði 51,83 metra. Evrópumetið í flokki Helga hefur staðið allt frá árinu 2000 og er 52,74 metrar en það setti hinn danski Jakob Mathiasen

Matthildur keppir í flokki T og F 37 en hennar greinar á EM verða 400 metra hlaup og langstökk. Matthildur á áttunda lengsta stökkið í langstökki í sínum flokki þetta árið þegar hún stökk 4.08 metra í Grosseto á Ítalíu. Íslandsmet hennar í greininni utanhúss er 4.28m en það setti Matthildur árið 2012. Þá á Matthildur sjöunda besta tíma ársins í 400 metra hlaupi í flokki T37 sem hún setti á opna meistaramótinu í Berlín er hún kom í mark á 1:14,70.  

Arnar keppir í hjólastólakappakstri og mun hann keppa í 100 metra og 200 metra kappakstri. Arnar setti ný Íslandsmet í báðum greinum í Sviss í maímánuði en Íslandsmet hans í 100 metra kappakstri er 18,65 sekúndur og Íslandsmet hans í 200 metra er 34,55 sekúndur. Sem stendur er Arnar með 26. besta tíma ársins í 100 metra kappakstri og 23. besta tíma ársins í 200 metra.

Áætluð keppnisdagskrá íslensku keppendanna í Swansea er eftirfarandi:

19. ágúst

 

Spjótkast, úrslit - Helgi Sveinsson F42

 

20. ágúst

 

100m hjólastólakappakstur, úrslit - Arnar Helgi Lárusson T53

 

21. ágúst

 

Langstökk, úrslit - Matthildur Ylfa Þorsteinsdóttir F37

200 hjólastólakapphlaup, úrslit - Arnar Helgi Lárusson T53

 

22. ágúst

 

400 metra hlaup úrslit - Matthildur Ylfa Þorsteinsdóttir T37