Ásdís búin að mála neglurnar í íslensku fánalitunum

Ásdís Hjálmsdóttir keppir í undankeppninni í spjótkasti á Evrópumótinu í frjálsum íþróttum í Zürich á morgun en hún er fyrsti Íslendingurinn sem fær að spreyta sig á mótinu. Alls keppa fimm á EM í frjálsum í ár.

Ásdís er fjórði kastarinn í seinni riðlinum á morgun og hefur keppni klukkan 10.16 að íslenskum tíma. Þetta verður fjórða Evrópumótið hennar en hún hefur einnig keppt í Gautaborg 2006, í Barcelona 2010 og í Helsinki 2012.

Ásdís er klár í slaginn en hún birti mynd á fésbókinni þar sem sést keppnismiðinn sem hún setur framan á sig þegar hún stígur inn á Letzigrund-leikvanginn.

Á myndinni, sem er hér fyrir neðan, má einnig sjá að Ásdís heldur í hefð sína og er búinn að mála neglurnar í fánalitunum.

Ásdís þarf að kasta 57,50 metra til þess að komast í úrslitin eða vera meðal tólf efstu.