Sigið er aukið áhyggjuefni

Jarðvísindamenn telja líkur á eldgosi í Bárðarbunguöskjunni hafa aukist eftir að umtalsvert sig hefur mælst í öskjunni undanfarna daga. Þá er ótalin skjálftavirknin á svæðinu í kringum öskjuna.

„Þetta er alveg þokkalegt sig, komið uppundir 20 metra. Við höfum verið að skoða stóru skjálftana sem hafa verið þarna undanfarið og í raun endurmeta þau gögn sem við höfum, því það lítur út fyrir að við höfum vanmetið að einhverju leyti stærð þessara skjálfta. Erum að staðsetja þá, sjá hvar þeir brotna og hversu djúpt þeir fara," segir Kristín Vogfjörð, eldgosafræðingur og rannsóknarstjóri hjá Veðurstofu Íslands.

Eftir fund vísindamanna fyrr í dag eru þrjár sviðsmyndir taldar líklegastar eins og staðan er núna, í versta falli fari að gjósa í Bárðargunguöskjunni.

„Það gæti þá leitt til sprengigoss, þannig að það yrði mökkur og öskufall og það gæti leitt til þokkalega stórs flóðs, en stærðin færi eftir því hversu fljótt vatnið kemst út úr öskjunni,“ segir Kristín.

„En ennþá er ekkert sem bendir til þess en við munum fylgjast vel með þessu.  Við munum bæta við mælum upp á öskjuna á morgun, og setja þar fleiri jarðskjálftamæla"

Er komin upp alvarlegri staða en í gær?

„Ja það er kannski svipuð staða og í gær en þetta sig er aukið áyggjuefni svo við erum farin að skoða þá sviðsmynd talsvert betur."



Fóru strax með börnin inn



Og áhrifa elgdossins gætir víða. Umhverfisstofnun sendi frá sér áríðandi tilkynningu fyrr í dag þar sem íbúar Reyðarfjarðar eru varaðir við líkamlegri áreynslu utandyra vegna hás styrks brennisteinstvíildis í andrúmslofti. Börn og viðkvæmt fólk eiga samkvæmt tilkynningu að halda sig innandyra og hafa glugga lokaða.

„Við fórum með elstu börnin út eftir hádegið þá fór skyndilega að hvessa," segir Elín Guðmundsdóttir, aðstoðaleikskólastjóri á leikskólanum Lyngholti á Reyðarfirði.

„Fljótlega eftir það sáum við hvað allt var orðið blámað í andrúmsloftinu og starfsfólkið fór að finna lykt og þau fundu fyrir óþægindum í hálsi. Þá ákváðum við að fara beint inn með krakkana. Við höfðum strax samband við Umhverfisstofnun sem sögðu okkur að hafa samband við heilbrigðiseftirlitið hér á Austurlandi. Þau fóru svo í að kanna hvað væri í andrúmsloftinu og eftir það fengum við tilmæli um að vera inni.“



Tiltölulega rólegur



Sigmundur Davíð Gunnlaugsson ,forsætisráðherra, var upplýstur um stöðu mála á fundi í samhæfingarmiðstöðinni í Skógarhlíð fyrr í dag. Þar sem sérfræðingar telja nú auknar líkur á gosi í Bárðarbunguöskjunni vegna sigs og skjálftavirkni þar hefur forsætisráðherra ákveðið að skipa viðbragðshóp, skipaðan ráðuneytisstjórum, sem vinnur í nánu samstarfi við Almannavarnir.

„Hópurinn tekur til starfa núna þar sem við teljum tilefni til að fylgjast nánar með þessu dag frá degi,“ sagði Sigmundir Davíð að fundi loknum.

„Þó er rétt að leggja áherslu á það að allt það sem byggt hefur upp í kringum almannavarnir á Íslandi, og eins þessi mikla þekking sem er til staðar hjá vísindamönnum okkar, veldur því að maður er þrátt fyrir allt tiltölulega rólegur yfir ástandinu því  ég tel að menn geti brugðist við hverju sem er, sama hver þróunin verður.“