Chuck kominn aftur og spilar með Keflavík

Bandaríski framherjinn Chucwudi Chijindu, betur þekktur sem Chuck, er genginn í raðir Keflavíkur í Pepsi-deild karla í fótbolta.

Chuck er íslenskum knattspyrnuáhugamönnum að góðu kunnur, en hann spilaði með Þór í Pepsi-deildinni 2013 og aftur í fyrra.

Frá þessu er greint á vef Víkurfrétta í kvöld, en Chuck sló í gegn sumarið 2013 og skoraði þá tíu mörk. Hann var mikið meiddur í fyrra og komst ekki á blað er Þórsarar féllu aftur niður í 1. deild.

Chuck verður löglegur með Keflavík 15. júlí þegar félagaskiptaglugginn verður opnaður og verður fyrsti leikur hans væntanlega gegn Víkingi 19. júlí.

Keflavík situr á botni Pepsi-deildarinnar með fjögur stig eftir tíu leiki.