Lögga tók Bolamynd af sér með leikmanni Kúrekanna

Lögreglumaður í Dallas er í ekkert sérstökum málum eftir að hafa hagað sér allt annað en fagmannlega um síðustu helgi.

Lögreglumaðurinn heitir Stephen Lister og var í vinnunni á sunnudag. Hann stöðvaði þá svartan sportbíl sem honum fannst vera ólöglegur.

Eftir að hafa spjallað við bílstjórann og skoðað bílinn komst hann að því að grunur hans var ekki réttur.

Þá bað hann bílstjórann um að stilla sér upp í mynd með sér enda var sá á sportbílnum Christine Michael, hlaupari hjá Dallas Cowboys.

Lister er í banastuði á myndinni, eins og sjá má, en Michael virðist líða frekar kjánalega.

Yfirmenn Lister hafa séð myndina og honum verður refsað fyrir þessa ófagmannlegu hegðun. Lister hefur beðist afsökunar.