Sannarlega búið að byggja brú

Brú inn í bransann er nýr samstarfssamningur sem Kvikmyndaskóli Íslands hefur gert við helstu framleiðslufyrirtæki landsins.

Nafnið er ekki úr lausu lofti gripið því samstarfið er hugsað sem leið fyrir útskrifaða nemendur KVÍ að launuðu starfi til lengri eða skemmri tíma og er gert ráð fyrir að sá tími verði á bilinu þrír til tólf mánuðir. Þau störf sem í boði eru eru breytileg og í samræmi við verkefnin sem fyrirtækin fást við hverju sinni.

Þegar er búið að gera starfsþjálfunarsamning við Saga film, Pegasus og 365 og samningur við RÚV er á lokastigi.

„Þessi samningur er stórt skref. Við erum stolt og ánægð með að hafa gengið til samstarfs við þessi fjögur fyrirtæki sem okkur hugnast mest fyrir nemendur okkar. Við teljum líka að samningurinn geti nýst sem kraftmikið afl inn í kvikmyndafyrirtækin og sjónvarpsstöðvarnar,“ segir Sigrún Gylfadóttir, kynningar- og framleiðslustjóri kvikmyndaskólans.

Hún tekur fram að um útskrifaða nemendur sé að ræða sem ráðnir verði. „Þetta er starfskraftur sem er tilbúinn að fara að vinna með fagfólki, takast á við hin ýmsu verkefni og fá sem víðtækasta reynslu. Það er svo mikilvægt strax að námi loknu og þarna er sannarlega búið að byggja brú.“

 

Greinin birtist fyrst í Fréttablaðinu 2. janúar 2016.