Aron fer ekki með landsliðinu til Danmerkur | Fjórir dottnir út

Geir Sveinsson, landsliðsþjálfari karla í handbolta, hefur valið þá átján leikmenn sem fara með íslenska landsliðinu á æfingamótið í Danmörku sem hefst á fimmtudaginn en lýkur á sunnudaginn.

Að viðhöfðu samráði við læknateymi landsliðsins var ákveðið að Aron Pálmarsson færi ekki til Danmerkur vegna meiðsla. Hann verður í áframhaldandi meðferð hér á landi fram yfir næstu helgi en þá kemur í ljós hvort hann geti tekið þátt á HM í Frakklandi.

Geir fækkar nú um fjóra í hópnum en þeir Sveinbjörn Pétursson, Stefán Rafn Sigurmannsson, Guðmundur Árni Ólafsson og Geir Guðmundsson detta nú allir út.

Þetta verða síðustu leikir íslenska liðsins fyrir Heimsmeistaramótið í Frakklandi sem hefst síðan í næstu viku en fyrsti leikur íslenska liðsins er á móti Spánverjum í Metz 12. janúar.  

Geir var búinn að velja 23 manna æfingahóp og misstu því fimm leikmenn af möguleikanum að fara með íslenska liðinu á HM. Allur hópurinn var búinn að æfa saman frá því í gær mánudaginn.

Mikil óvissa hefur verið í kringum stöðuna á þeim Aroni Pálmarssyni, Ásgeiri Erni Hallgrímssyni og Arnóri Atlasyni sem hafa allri verið að glíma við leiðinleg og langvinn meiðsli. Ásgeir Örn og Arnór fara báðir með og eru því leikfærir en nú bíða menn bara og sjá hvað gerist með Aron.

Íslenska landsliðið mætir Spáni, Slóveníu, Túnis, Angóla og Makedóníu í riðlakeppni HM í handbolta í Frakklandi en fjórar efstu þjóðirnar komast síðan í sextán liða úrslit.

Hér fyrir neðan má sjá íslenska hópinn.

Leikmannahópur Íslands á æfingamótinu:

Markmenn

Aron Rafn Eðvarðsson, Bietigheim

Björgvin Páll Gústavsson, Bergischer HC

Línumenn

Arnar Freyr Arnarsson, Kristianstad

Bjarki Már Gunnarsson, Aue

Kári Kristján Kristjánsson, ÍBV

Vignir Svavarsson, Team Tvis Holstebro

Vinstri hornamenn

Bjarki Már Elísson, Fuchse Berlin

Guðjón Valur Sigurðsson, Rhein-Neckar Löwen

Hægri hornamenn

Arnór Þór Gunnarsson, Bergischer HC

Vinstri skytttur

Guðmundur Hómar Helgason, Cesson Rennes

Ólafur Andrés Guðmundsson, Kristianstad

Tandri Konráðsson, Skjern

Leikstjórnendur

Arnór Atlason, Aalborg Håndbold

Gunnar Steinn Jónsson, Kristianstad

Janus Daði Smárason, Haukar

Hægri skyttur

Ásgeir Örn Hallgrímsson, Nimes

Ómar Ingi Magnússon, Aarhus Håndbold

Rúnar Kárason, Hannover/Burgdorf

Þessir duttu út úr æfingahópnum núna:

Sveinbjörn Pétursson, Stjarnan

Stefán Rafn Sigurmannsson, Aalborg Håndbold

Guðmundur Árni Ólafsson, Haukar

Geir Guðmundsson, Cesson Rennes

Þessir voru á 28 manna lista en komust ekki í æfingahópinn:

Grétar Ari Guðjónsson, Haukar (markvörður)

Hreiðar Levý Guðmundsson, Halden (markvörður)

Elvar Örn Jónsson, Selfoss

Óðinn Þór Ríkharðsson, FH

Sigurbergur Sveinsson, ÍBV