Fótbolti

Neymar búinn að ná Ronaldinho á Barcelona-listanum

Óskar Ófeigur Jónsson skrifar
Neymar fagnar marki sínu og því að vera búinn að ná Ronaldinho.
Neymar fagnar marki sínu og því að vera búinn að ná Ronaldinho. Vísir/Getty
Brasilíumaðurinn Neymar er nú búinn að ná landa sínum Ronaldinho á markalista spænska stórliðsins Barcelona og á heimasíðu Barca má sjá flottan samanburð á þessum litríku Brössum.

Neymar skoraði sitt 94. mark fyrir Barcelona á móti Eibar um síðustu helgi en hann náði þessum markafjölda í 164 leikjum og á þremur og hálfu tímabili.

Ronaldinho var í fimm tímabil með Barcelona frá 2003 til 2008 og skoraði 94 mörk í 207 leikjum. Neymar var því 43 leikjum á undan honum í 94 mörkin.

Ronaldinho var aðalstjarna Barcelona liðsins þegar hann var í Katalóníu og tvisvar kosinn besti knattspyrnumaður heims hjá FIFA (2004 og 2005).

Neymar kom til Barcelona 21 árs en hann heldur upp á 25 ára afmælið sitt í byrjun næsta mánaðar.  Ronaldinho lék með félaginu frá 23 ára aldri til að hann var 28 ára.

Báðir eiga þessir Brasilíumenn það sameiginlegt að búa yfir ótrúlegri tækni og hæfileika til að gera hið óútreiknanlega inn á fótboltavellinum.

Neymar er vissulega búinn að ná Ronaldinho á markalista Barcelona en hann á enn nokkuð í langt að verða markahæsti Brasilíumaðurinn hjá félaginu. Landi hans Rivaldo skoraði 130 mörk fyrir Barcelona frá 1997 til 2002. Neymar þarf því að skora 36 mörk til viðbótar til að ná honum.

Mörk Ronaldinho eftir tímabilum:

Fyrsta tímabil (2003/04): 22 mörk

Annað tímabil (2004/05): 13 mörk

Þriðja tímabil (2005/06): 26 mörk

Fjórða tímabil (2006/07): 24 mörk

Fimmta tímabil (2007/08): 9 mörk

Mörk Neymar eftir tímabilum:

Fyrsta tímabil (2013/14): 15 mörk

Annað tímabil (2014/15: 39 mörk

Þriðja tímabil (2015/16): 31 mark

Fjórða tímabil (2016/17): 9 mörk

Hér fyrir neðan má einnig sjá samanburð á þeim félögum sem mátti finna á Twitter-síðu Barcelona.

Fótbolti Spænski boltinn

Mest lesið


Fleiri fréttir

Sjá meira


×

Mest lesið