Aníta hitaði upp fyrir RIG með því að ná þriðja sæti á sterku móti í Þýskalandi

Aníta Hinriksdóttir náði þriðja sæti í 800 metra hlaupi á sterku móti í Düsseldorf í Þýskalandi í kvöld.

Aníta var þarna að hlaupa sitt fyrsta 800 metra hlaup á árinu 2017 en hún kom í mark á 2:02,64 mínútum og var því rúmri sekúndu frá Íslandsmeti sínu.

Joanna Jóźwik frá Póllandi var öruggur sigurvegari en hún hljóp á 2:00,91 mínútum.

Aníta var í hörku keppni um annað sætið en rétt á undan henni var hin sterka Selina Büchel frá Sviss.

Aníta var aftur á móti fljótari en stórstjörnurnar Marina Arzamasova frá Hvíta-Rússlandi og Christina Hering frá Þýskalandi sem voru í næstu sætum á eftir henni.

Næsta mót hjá Anítu Hinriksdóttir er svo Reykjavíkurleikarnir í Laugardalshöllinni á laugardaginn.