Frönsku forsetaframbjóðendurnir fá allir sínar 15 mínútur í sjónvarpi í kvöld

Frönsku frambjóðendurnir ellefu munu allir koma fram í frönsku sjónvarpi í kvöld þar sem hverjum og einum hefur verið úthlutað korteri til að reyna að sannfæra kjósendur um ágæti sitt. Kosningabaráttunni mun svo ljúka annað kvöld en fyrri umferð forsetakosninganna fara fram á sunnudaginn.

Emmanuel Macron er enn talinn líklegastur til að taka við af sósíalistanum Francois Hollande sem lætur af embættinu í sumar.

Upphaflega stóð til að kosningabaráttunni lyki með sjónvarpskappræðum allra frambjóðenda í kvöld. Margir þeirra hótuðu þó að sniðganga slíkar kappræður.

Í grein Aftonbladet kemur fram að margir frambjóðendur hafi ekki viljað standa frammi fyrir að geta ekki svarað fyrir ákveðin mál sem kynnu að koma upp í slíkum kappræðum, áður en kosningabaráttunni lyki. Var því ákveðið að grípa til þess að frambjóðendur yrðu spurðir spurninga, hver í sínu lagi.

Hver og einn frambjóðandi fær korter til að svara spurningum og í lokin fá þeir tveir og hálfa mínútu þar sem þeir geta talað beint til franskra kjósenda og reynt að sannfæra þá hvers vegna þeir séu best til þess fallnir að leiða frönsku þjóðina á næstu árum.

Baráttan á milli fjögurra efstu

Skoðanakannanir hafa bent til að nokkuð jafnt sé milli fjögurra frambjóðenda, þar sem miðjumaðurinn Macron og Marine Le Pen, leiðtogi Þjóðfylkingarinnar, mælast með nokkurt forskot á Repúblikanann Francois Fillon og vinstrimanninn Jean-Luc Mélenchon. Möguleikar hinna sjö frambjóðendanna eru taldir litlir sem engir. Macron þykir svo líklegast til að bera sigur úr býtum í síðari umferð kosninganna sem fram fara 7. maí þar sem kosið er á milli tveggja efstu úr fyrri umferðinni.

Skoðanakönnun Ifops sem birt var í gær:

Emmanuel Macron, En Marche!, 23,5 prósent

Marine Le Pen, Þjóðfylkingin, 22,5 prósent

François Fillon, Repúblikanaflokkurinn, 19,5 prósent

Jean-Luc Mélenchon, Vinstriflokkurinn, 18,5 prósent

Benoît Hamon, Sósíalistaflokkurinn, 7,5 prósent

Nicolas Dupont-Aignan, Áfram Frakkland, 4 prósent

Philippe Poutou, Nýi andkapitalistaflokkurinn, 1,5 prósent

Jean Lassalle, Andstaða, 1,5 prósent

François Asselineau, Repúblikanasambandið, 1 prósent

Nathalie Arthaud, Verkamannabaráttan, 0,5 prósent

Jacques Cheminade, Eining og framfarir, 0 prósent