Sólríkur sunnudagur fram undan

Það er sólríkur sunnudagur fram undan nánast um allt land næstu helgi ef marka má spákortin á vef Veðurstofu Íslands. Teitur Arason, vakthafandi veðurfræðingur, segir að ástæðan fyrir spánni sé sú að búist sé við hæðarhrygg yfir landinu á sunnudag.

„Nýjustu spár gera ráð fyrir að þá fari hæðarhryggur yfir landið og fyrir þá sem vilja sólríkt, rólegt og gott veður þá er það draumastaðan en ekki lægðirnar. Hæðarhryggurinn færir okkur sólina svo við vonum bara að þessi spá rætist fyrir þá sem telja sig sóllitla þetta sumarið sem eru nú kannski svolítið margir,“ segir Teitur.

Aðspurður hvort að sólin haldist eitthvað í kortunum fram í næstu viku segir Teitur svo ekki vera.

„Það kemur lægð í kjölfarið svo það er gert ráð fyrir að það rigni á mánudaginn og það má því segja að þetta sé hæðarhryggurinn á milli lægðanna.“

Veðurhorfur í dag og næstu daga:

Fremur hægur vindur, skýjað með köflum og skúrir á víð og dreif, einkum seinnipartinn. Suðaustan 5-13 á morgun, en austlægari við norðurströndina. Víða rigning, einkum syðst, en þurrt að kalla austanlands. Hiti 8 til 16 stig, hlýjast við suðausturströndina í dag en í innsveitum norðaustantil á morgun.

Á fimmtudag:

Suðaustan og austan 8-15 m/s, en heldur hægari vindur eftir hádegi. Þurrt norðanlands framan af degi, annars víða rigning eða skúrir. Hiti 10 til 17 stig, hlýjast á Norðvesturlandi.

Á föstudag:

Sunnan 8-13 og rigning á sunnanverðu landinu. Hægari breytileg átt og bjart með köflum norðantil, en stöku skúrir síðdegis. Hiti 9 til 16 stig, hlýjast fyrir norðan.

Á laugardag:

Hæg norðlæg eða breytileg átt. Skýjað og dálítil væta norðanlands. Skýjað með köflum og síðdegisskúrir sunnan heiða. Hiti frá 7 stigum við norðurströndina, upp í 16 stig á Suðurlandi.

Á sunnudag:

Fremur hæg vestlæg átt. Víða léttskýjað á landinu og hiti 12 til 18 stig.

Á mánudag:

Útlit fyrir sunnanátt með rigningu, en þurrt og fremur hlýtt á Norður- og Austurlandi.