Ósáttur við umfjöllun og segir hið sanna munu koma í ljós

Sveinn Gestur Tryggvason, sem grunaður er um að hafa ráðið manni bana á heimili hans í Mosfellsdal í júní, neitar því alfarið að hafa slegið til hins látna eða tekið hann hálstaki. Á engum tímapunkti hafi hann veist að hinum látna, frekar en aðrir sakborningar í málinu. 

Er hinn grunaði mjög ósáttur við þá umfjöllun sem málið hefur fengið í fjölmiðlun til þessa.

Sveinn Gestur „neitar því alfarið að hafa slegið til hans né að hafa tekið hann hálstaki. Hann vill ítreka að aldrei var veist að hinum látna, heldur var umbjóðandi minn ásamt öðrum sakborningum í málinu að verjast áras frá hinum látna, þar sem hann var í sturlunarástandi og undir miklum áhrifum fíkniefna líkt og fram hefur komið við rannsókn lögreglu,“ segir í tilkynningu frá lögmanni hans, Þorgils Þorgilssyni, til fjölmiðla.

Þvertaka fyrir neyslu

Rétt er að taka fram að lögregla hefur á engum tímapunkti staðfest við fjölmiðla að Arnar hafi verið undir áhrifum fíkniefna eins og lögmaðurinn heldur fram. Fjölskylda Arnars hefur þvertekið fyrir að Arnar hafi verið í neyslu. Litlar upplýsingar hafa fengist frá lögreglu utan þeirra sem fram hafa komið í gæsluvarðhaldsúrskurði yfir Sveini Gesti.

Sex voru upphaflega handtekin í málinu en Sveinn Gestur er einn í gæsluvarðhaldi og verður fram yfir miðjan ágúst. Rannsókn lögreglu er lokið og er málið nú á borði héraðssaksóknara sem mun taka ákvörðun hvort gefin verði út ákæra í málinu.

Matarboð stóð yfir á heimili Arnars og unnustu hans þegar sex manns bar að garði. Þar voru auk þeirra tveggja tíu daga gömul dóttir þeirra og hjartveikur afi unnustunnar sem flytja þurfti á sjúkrahús seinna um kvöldið, í áfalli eftir það sem gerst hafði. 

Æsingsóráðsheilkenni greint

Þorgils Þorgilsson, lögmaður Sveins Gests, sendi fjölmiðlum tilkynningu um hádegisbil í dag í kjölfar umfjöllunar um málið í kvöldfréttum Stöðvar 2 í gær. Þar kom fram ný skýring á dauða Arnars sem er til skoðunar, svokallað æsingsóráðsheilkenni.

Áður hefur komið fram að hálstak og þvinguð frambeygð staða sem Sveinn Gestur hélt hinum látna í hafi valdið dauða Arnars. Það er talið hafa leitt til mikillar minnkunar á öndunargetu sem hafi leitt til köfnunar. Hefur þessi skýring verið birt í greinargerð lögreglu sem fylgt hefur kröfunni um gæsluvarðhald yfir Sveini Gesti.

Hina skýringuna má finna í krufningsskýrslu réttarmeinafræðings sem fréttastofa hefur undir höndum. Þar segir að hinn látni hafi greinst með svokallað æsingsóráðsheilkenni. Sigurður Örn Hektorsson, yfirlæknir á fíknideild Landspítalans, segir að um sé að ræða afar sjaldgæft heilkenni.

Upptökur af Snapchat meðal ganga málsins

Að neðan má sjá tilkynningu Sveins Gests til fjölmiðla í heild sinni. Fram hefur komið í greinargerð lögreglu að til séu upptökur af Snapchat frá umræddu kvöldi sem Sveinn Gestur og Jón Trausti Lúthersson, sem einnig sat í gæsluvarðhaldi um tíma vegna málsins, tóku á farsíma sína. Eru upptökurnar á meðal gagna málsins.

Þær sýna Arnar liggja hreyfingarlausan, blóðugan og bláan í framan. Þar má einnig heyra hvernig þeir tala á niðrandi hátt til Arnars og að svona fari fyrir þeim sem „ráðist að sér.“ Þá segja vitni að ekið hafi verið yfir fætur Arnars á amerískum pallbíl.

Tilkynningin í heild sinni:

„Í kjölfarið af fréttaumfjöllun í gær vill umbjóðandi minn Sveinn Gestur Tryggvason koma því á framfæri að hann hefur allt frá upphafi neitað sök í málinu. Umbjóðandi minn ásamt öðrum sakborningum komu að heimili hins látna til að sækja garðverkfæri sem umbjóðandi minn átti. Allir sakborningar voru að vinna hjá sömu garðaþjónustunni en hinn látni hafði áður verið að vinna með þeim og hafði boðist til að geyma verkfæri yfir vetrartíð. Þetta hefur verið staðfest í rannsókn lögreglu.

Á engum tímapunkti veittist hvorki umbjóðandi minn né aðrir sakborningar að hinum látna, en við komu þeirra brást hinn látni ókvæða við og réðist gegn hópnum. Sakborningar í málinu flúðu á bifreiðum sínum eftir að hinn látni hafði valdið töluverðum skemmdum á bifreiðum þeirra. Þegar sakborningar voru komnir neðar í götuna hringdi umbjóðandi minn á lögreglu og óskaði eftir aðstoð. Á þeirri stundu kom hinn látni hlaupandi með girðingarstaur úr járni og gerði sig líklegan til að ráðast aftur á sakborninga. Einn sakborninga tók á móti honum og náði að afvopna hann. Umbjóðandi minn tók hinn látna þá í tök, og hélt honum þar sem hinn látni lá á maganum með hendur fyrir aftan bak og var ætlunin að bíða eftir lögreglu. Þegar umbjóðandi minn varð þess var að hann væri látinn hringdi hann strax á neyðarlínu og hóf endurlífgun.

Umbjóðandi minn neitar því alfarið að hafa slegið til hans né að hafa tekið hann hálstaki. Hann vill ítreka að aldrei var veist að hinum látna, heldur var umbjóðandi minn ásamt öðrum sakborningum í málinu að verjast áras frá hinum látna, þar sem hann var í sturlunarástandi og undir miklum áhrifum fíkniefna líkt og fram hefur komið við rannsókn lögreglu.

Málið er í heild sinni mjög sorglegt og er umbjóðandi minn þess fullviss að niðurstaða hjá ákæruvaldi og eftir atvikum dómstóla mun leiða í ljós sannleikann sem er ekki í neinum takti við þá umfjöllun sem málið hefur áður fengið. Vonar umbjóðandi minn að fólk bíði með að fella dóma í máli þessu þar til málið hefur fengið eðlilega málsmeðferð hjá ákæruvaldi og eftir atvikum dómstólum.“