Stuðningsmenn Eagles vilja aldrei sjá Morelli aftur

Stuðningsmenn Philadelphia Eagles hafa fengið nóg af dómaranum Pete Morelli og vilja að NFL-deildin sjái til þess að hann dæmi aldrei aftur hjá Eagles.

Er þessi frétt er skrifuð höfðu um 50 þúsund manns skrifað undir áskorun til deildarinnar um að halda Morelli frá leikjum liðsins.

Í síðustu fjórum leikjum Eagles sem Morelli hefur dæmt í hefur hann refsað liði Eagles mun meira en andstæðingnum. Í heildina hefur Eagles fengið á sig 40 víti en andstæðingarnir aðeins átta.

Eagles lagði Carolina síðasta fimmtudag þó svo að hafa fengi dæmd á sig tíu víti fyrir 126 jördum. Carolina fékk aðeins dæmt á sig eitt víti í leiknum. Það eru ekki ný tíðindi að staðan sé svona í leikjunum hjá Morelli.

Í leik gegn Lions í fyrra þá dæmdi dómarateymi Morelli fjórtán víti gegn Eagles en aðeins tvö víti á Lions.