Hermann Hreiðars á leið til Indlands

Samkvæmt heimildum mbl.is mun Hermann Hreiðarsson aðstoða David James, fyrrum liðsfélaga sinn hjá Portsmouth og ÍBV, við þjálfun indverska knattspyrnuliðsins Kerala Blasters.

Lið Kerala Blasters, sem spilar heimaleiki sína á glæsilegum 55 þúsund manna krikketvelli, er sem stendur í 8. sæti Indversku ofurdeildarinnar, með átta stig eftir átta leiki.

Deildin var sett á laggirnar fyrir á tæpum fjórum árum. Í henni leika tíu lið, sem eru flest hver með þekkta erlenda leikmenn í sínum röðum.

Leikmenn á borð við Diego Forlan, Roberto Carlos, Allesandro Del Piero og Robert Pires hafa leikið í indversku ofurdeildinni.

Þá samdi Eiður Smári Guðjohnsen við indverska liðið Pune City árið 2016 en spilaði þó aldrei leik fyrir liðið vegna meiðsla.