Austurrískur fálkavinur vill lána 10 myndavélar

Fálkasetur Íslands hefur fengið samþykki frá Umhverfisstofnun til þess að setja upp myndavélar við fálkahreiður og reyna þannig að bægja eggjaþjófum frá. Fálkasetrið, sem er frjáls félagsskapur, mun hafa samráð við Náttúrufræðistofnun Íslands um verkefnið.

„Nú krossar maður bara fingur og vonar að þetta gangi allt saman vel. Sérstaklega að þessi umræða verði til þess að menn sem hafa haft þetta í huga haldi að sér höndum. Þannig að þetta hafi fælingaráhrif,“ segir Aðalsteinn Örn Snæþórsson, líffræðingur og formaður stjórnar Fálkaseturs. Það sé enginn áhugi á því að standa fólk að verki við að stela eggjum. „Við viljum bara að fólk láti af þessum ósið.“

Hlutverk Náttúrufræðistofnunar verður að koma með tillögur um við hvaða hreiður skuli setja myndavélarnar. Fálkasetrið sér síðan um að afla myndavéla og aðstoða við uppsetningu þeirra og aðra framkvæmd. Nú þegar hefur ein myndavél verið keypt og búið er að koma henni fyrir. „Síðan höfum við verið í samstarfi við austurrískan fálkaáhugamann og -vin. Hann á tíu svona vélar sem hann hefur verið tilbúinn til að lána okkur. Það er ekki búið að koma þeim öllum upp en einhverjum þeirra,“ segir Aðalsteinn.

Sjá einnig: Fjórðungur fálka hefur lent í skothríð á Íslandi

Fréttablaðið hefur áður greint frá því að vitað er um bónda í Aðaldal sem setti upp myndavél á landareign sinni, þar sem fálkaóðal er. Sumarið eftir að myndavélin var sett upp komust ungar á legg í fyrsta skipti í áratug. Parið kom aftur upp ungum ári seinna. Sú myndavél var ekki sett upp við hreiðrið sjálft heldur við gönguleið að hreiðrinu.

Aðalsteinn segir að varp sé byrjað hjá fálkanum en ekkert sé hægt að segja til um það á þessu stigi hversu vel það muni heppnast. „Það er ekki búið að heimsækja öll hreiður eða skoða. En undirbúningur að varpi fálka hefst snemma. Kvenfuglinn hættir að veiða í mars og sest við hreiðurklettinn og karlfuglinn ber í hana æti. Fuglinn verpir síðan ekki fyrr en undir miðjan apríl.“

Vitað er að undanfarin ár hafa egg verið tekin úr hreiðrum fálka. Grunur leikur á að blásið sé úr þeim og þau seld söfnurum. Hávær orðrómur er á Húsavík um það hverjir eru að verki, en það hefur ekki verið sannað.

Í ágúst í fyrra var karlmaður handtekinn í Norrænu með egg úr sjaldgæfum fuglum. Þar á meðal voru smyrilsegg, en ekki fálkaegg. Mál mannsins var til rannsóknar hjá Tollstjóra, en hefur nú verið sent lögreglu.