Heimir fékk gæsahúð yfir skilaboðum leikmanna sem ekki voru valdir

Heimir Hallgrímsson landsliðsþjálfari tilkynnti í dag þá 23 leikmenn sem fara á HM í Rússlandi í sumar. Stór nöfn náðu ekki inn í þennan hóp og sagði Heimir það vera erfitt að tilkynna þeim það sem ekki fóru með.

Heimir sendi þeim leikmönnum sem ekki voru valdir sjálfur skilaboð í morgun og tilkynnti þeim það. Hann sagðist hafa fengið gæsahúð við að lesa sum svörin sem hann fékk til baka og tók þá upp símann og las tvenn skilaboð í beinni útsendingu á Vísi og Stöð 2 Sport.

„Takk fyrir skilaboðin. Gangi ykkur sem allra best, ég er hrikalega stoltur yfir því að vera hluti af þessum hópi. Mun peppa strákana alla leið, mundu að ég er alltaf klár,“ las Heimir en hann vildi ekki gefa það upp frá hverjum skilaboðin væru.

„Auðvitað svekkjandi. Ég var alls ekki undir þetta búinn, ég óska ykkur alls hins besta og mun vera stuðningsmaður númer eitt. Er að sjálfsögðu alltaf klár er kallið kemur. Er líka glaður fyrir hönd vina minna sem fengu ekki að upplifa EM og eru mögulega í hópnum að þessu sinni.“

KSÍ skilaði 35 manna hóp inn til FIFA og hefur til 4. júní til þess að gera einhverjar breytingar, fari svo að einhverjir úr lokahópnum forfallist.

Þeir leikmenn sem eru til taks eru eftirfarandi:

Ögmundur Kristinsson, Excelsior

Ingvar Jónsson, Sandefjord

Jón Guðni Fjóluson, Norrköping

Hjörtur Hermannsson, Bröndby

Theodór Elmar Bjarnason, Elazgispor

Arnór Smárason, Hammarby

Rúnar Már Sigurjónsson, St. Gallen

Elías Már Ómarsson, Gautaborg

Viðar Örn Kjartansson, Maccabi Tel Aviv

Andri Rúnar Bjarnason, Helsinborg

Kjartan Henry Finnbogason, Horsens

Kolbeinn Sigþórsson, Nantes