Lögreglan óskar eftir myndböndum af háskaakstri skömmu fyrir tíu bíla áreksturinn

Lögreglan á höfuðborgarsvæðinu óskar eftir upplýsingum um svarta Suzuki Swift bifreið vegna rannsóknar hennar á umferðarslysi á Reykjanesbraut í Hafnarfirði rétt fyrir klukkan 8 í morgun. Segist lögreglan eiga við myndskeið af ferð bílsins á Reykjanesbraut í aðdraganda slyssins ef einhver kann að hafa slíkt undir höndum. Þá eru þeir tjónþolar, sem ekki ræddu við lögregluna á vettvangi í morgun, beðnir um að setja sig í samband við lögreglustöðina á Flatahrauni 11 í Hafnarfirði.

Upplýsingum má koma á framfæri í tölvupósti á netfangið rosa@lrh.is eða í síma 444 1000. Einnig er tekið við ábendingum í einkaskilaboðum á fésbókarsíðu embættisins.

Lögreglu bárust nokkrar tilkynningar um háskalegt aksturslag ökumanns bílsins skömmu fyrir slysið, en ökumaðurinn var handtekinn á vettvangi, grunaður um akstur undir áhrifum fíkniefna. Tíu bílar skemmdust í slysinu og var ökumaður eins þeirra fluttur á slysadeild til aðhlynningar. Fjóra bílanna varð að fjarlægja af vettvangi með dráttarbíl. Vegna slyssins var Reykjanesbraut lokuð til norðurs frá Ásbraut að Lækjargötu í um það bil tvær og hálfa klukkustund.

Vísir hafði eftir sjónarvotti að ökumaður bílsins hefði verið á flótta undan lögreglunni áður en hann ók inn í bílþvöguna fyrir framan hringtorgið við Lækjargötu. Hafði hann þá áður flakkað milli akreina í framúrakstri á miklum hraða með lögregluna á eftir sér á Reykjanesbrautinni.