Primera Air efst á svörtum lista í Svíþjóð

Af þeim 23 flugfélögum sem rötuðu á „svartan lista“ sænsku neytendasamtakanna Råd & Rön og tímaritsins Vagabond trónir Primera Air á toppnum. Ástæðan er tregða flugfélagsins við að greiða viðskiptavinum sínum bætur, til að mynda vegna seinkunar á flugi, en í frétt SVT segir að Primera Air hafi alls neitað að greiða viðskiptavinum rúmlega 1,3 milljónir íslenskra króna í fyrra.

Meðal annarra flugfélaga sem rata ofarlega á svarta listann eru Wizz Air, Turkish Airlines, Lufthansa og Air China.

Í samtali við SVT segir ritstjóri Vagabond að flestar kvartanir flugfarþega tengist seinkunum. Það skýrist að miklu leyti af harðri samkeppni í flugbransanum, til að mynda með tilkomu nýrra flugfélaga, sem stytti tímann sem flugfélög hafa til að athafna sig á flugvöllum. Því megi ekki mikið út af bregða ætli flugfélög að halda áætlun og um leið sleppa við bótakröfur frá viðskiptavinum sínum.

Ritstjórinn undirstrikar að svarti listinn heldur aðeins utan um þau flugfélög sem þykja standa sig verst í að vinna úr kvörtunum viðskiptvina sinn. Ekki sé um að ræða úttekt á lélegri þjónustu um borð, almennri stundvísi eða ánægju viðskiptavina. 

Vélar á vegum Primera Air-samstæðunnar fljúga frá Íslandi undir flugrekstrarleyfi sem skráð er í Lettlandi. Félagið flýgur fyrir íslenskar ferðaskrifstofur og flugfreyju- og þjónar um borð í vélum félagsins eru flest frá Lettlandi.