Meirihlutinn styður verkföll

Ríflega helmingur styður fyrirhugaðar verkfalls­aðgerðir Eflingar, VR, Verkalýðsfélags Akraness og Verkalýðsfélags Grindavíkur í kjaradeilu þeirra við Samtök atvinnulífsins (SA). Tæpur þriðjungur er þeim andvígur.

Þetta kemur fram í niðurstöðum könnunar sem Zenter rannsóknir unnu fyrir Fréttablaðið. Könnunin var unnin síðasta dag febrúar og fyrsta dag mars. 1.441 úr könnunarhópi fyrirtækisins svaraði, allt einstaklingar átján ára eða eldri. Svör þeirra voru vigtuð eftir aldri, kyni og búsetu til að endurspegla sem best álit þjóðarinnar.

Sem kunnugt er eru samningaviðræður félaganna við SA í hnút og hafa verið um nokkurt skeið. Ræstingafólk Eflingar samþykkti fyrir helgi, með afgerandi hætti, eins dags vinnustöðvun 8. mars. Álitamál er hins vegar hvort atkvæðagreiðslan hafi verið lögmæt eður ei og bíður það úrslausnar Félagsdóms. VR hyggur einnig á skæruverkföll í mánuðinum og boðað verður til allsherjarverkfalls í maí semjist ekki fyrir þann tíma.

Af þeim sem tóku afstöðu til spurningar um verkfallsaðgerðirnar sögðust tæp 56 prósent vera frekar eða mjög sammála aðgerðunum. Um einn af hverjum sjö var hvorki hlynntur né andvígur þeim og tæpur þriðjungur var andvígur.

Aðgerðirnar njóta mests stuðnings á Reykjanesi, eða hjá um 73 prósentum íbúa. Næst á eftir fylgja íbúar Norðurlands og Austurlands með rúm 60 prósent.

Sé litið til stuðnings eftir stjórnmálaflokkum mælist hann langminnstur hjá kjósendum Sjálfstæðisflokksins, aðeins fimmtungur þeirra styður aðgerðirnar. Tveir af hverjum þremur eru þeim andvígir. Næstminnstur er stuðningurinn hjá Framsóknar- og Viðreisnarfólki, eða undir helmingi. Rúm 60 prósent Vinstri grænna eru þeim hlynnt en hjá Flokki fólksins, Samfylkingunni og Pírötum mælist stuðningur á bilinu 70-80 prósent. Níutíu prósent þeirra sem kjósa flokka sem ekki eiga mann á þingi styðja aðgerðirnar.

„Ég átti allt eins von á verri niðurstöðu miðað við hve hörð og óvægin orðræðan hefur verið og framsetningin á tillögum okkar,“ segir Ragnar Þór Ingólfsson, formaður VR.

Ragnar Þór segist finna fyrir gríðarlegum stuðningi og að hann eigi eftir að aukast þegar nær dregur. Ýmislegt eigi eftir að koma í ljós.

„Boðaðar aðgerðir núna eru umfangsminni en árið 2015. Ég held að það sé minna á milli en umræðan gefur til kynna. Síðast þurfti verkfallsboðun til að ná samningum og við vonum að hið sama gerist nú,“ segir Ragnar Þór.

„Miðað við hvað kjaramál hafa fengið mikið pláss í umræðunni að undanförnu kemur mér á óvart að það sé ekki meiri stuðningur við verkföll en þarna birtist. Sér í lagi þar sem flestir gera ráð fyrir að það séu einhverjir aðrir en þeir sjálfir sem fari í verkföll,“ segir Halldór Benjamín Þorbergsson, framkvæmdastjóri SA. „Verkföll í kólnandi hagkerfi, loðnubresti og þegar flugfélögin eru í kröppum dansi er mikið hættuspil með óljósa útkomu.“