Segir stjórnmálamenn bera ábyrgð á uppgangi glæpagengja: „Hvað eru stjórnvöld búin að vera að gera?“

„Þetta er algjörlega bara pólitíkin sem um er að kenna í þessu, ekkert annað.“

Þetta segir Snorri Magnússon, formaður Landssambands lögreglumann. Það séu engin nýmæli í svartri skýrslu greiningardeildar ríkislögreglustjóra um skipulagða glæpastarfsemi. Bæði stjórnvöld og lögreglan hafi í áratugi verið meðvituð um uppgang og umsvif erlendra glæpagengja á Íslandi og vissu í hvað stefndi. Hann segir stjórnmálamenn einfaldlega hafa kosið að láta hjá líða að bregðast við með viðunandi hætti.

Snorri var í útvarpsviðtali í Bítinu á Bylgjunni í morgun. Til umræðu var ný skýrsla greiningardeildar ríkislögreglustjóra um skipulagða glæpastarfsemi. Þar kemur fram að skipulögð brotastarfsemi sé alvarlegasta ógn við íslenskt samfélag að frátöldum náttúruhamförum.

„Það er ekkert nýtt þarna, ekki neitt“

Samkvæmt upplýsingum lögreglu tengdust á annað hundrað manns fíkniefnamálum á árunum 2015-2017 sem flokkast undir skipulagða brotastarfsemi. Dómsmálaráðherra og forsætisráðherra hafa þegar brugðist við niðurstöðum skýrslunnar með því að skipa sérstakan samráðshóp sem er gert að skilgreina nauðsynlegar aðgerðir.

Snorri gefur ekki mikið fyrir viðbrögð stjórnvalda og segir þessar upplýsingar margsinnis hafa komið fram í skýrslum greiningardeildar ríkislögreglustjóra.

„Það er ekkert nýtt þarna, ekki neitt. Þannig að maður bara spyr aftur í tímann, hvað eru stjórnvöld búin að vera að gera því það er búið að vera að tala um þetta í áraraðir, ef ekki um áratuga skeið. Og þetta hefur ekkert með hrunið að gera. Niðurskurður til löggæslumála, fækkun lögreglumanna var byrjað löngu fyrir hrun.“ Í skýrslunni hafi alþjóðlega viðurkennd greiningarfræði verið beitt og miðast við viðbragðsgetu lögreglu sem Snorri segir að sé mjög lítil.

Staðan sé bein afleiðing af fjársvelti og manneklu.

Spurður hvort stjórnvöld hafi ekki einmitt aukið fjármagn til löggæslumála svarar Snorri því til að slíkt yrði að skoða í samhengi.„Vissulega eru þetta fleiri krónur. En eru þetta fleiri krónur miðað við fyrri tíð? Þá er ég að tala um fjölda lögreglumanna og svo framvegis, fjölda glæpamanna, fjölda ferðamanna hingað til lands. Eru þetta í raun fleiri krónur? Ég segi nei.“

Glæpamenn sem hafi hlotið herþjálfun

Í skýrslunni kom fram að erlend glæpagengi væru umsvifamikil hérlendis.



„Við erum að horfa upp á fólk sem kemur frá löndum þar sem er almenn herskylda til dæmis, einstaklingar sem eru með þjálfun í slíku, beita mjög grófu ofbeldi, ég veit ekki hvað á að fara djúpt í þetta, ég vil helst ekkert fara neitt voðalega djúpt í þetta. Þetta eru mjög alvarleg brot, þetta eru beinbrot, mjög alvarleg líkamsárásarbrot og svo framvegis.“

Hann segir að blessunarlega kannist flestir Íslendingar ekki við þennan heim.

 

Sjaldgæft fíklar tilkynni ofbeldið

„En við erum að horfa upp á mjög alvarleg ofbeldisbrot, við erum að horfa upp á mjög alvarleg kynferðisbrot, við erum að horfa upp á mjög alvarleg fjársvikabrot og svo framvegis og framvegis og framvegis sem tilgreind eru í þessari skýrslu ríkislögreglustjórans og þetta eru sjaldnast brot sem rata inn á borð lögreglu, það er sjaldnast einhver sem kemur og kærir slík brot […] vegna þess að, ef við skoðum bara fíkniefnaheiminn til dæmis, það kærir það enginn eða sjaldan að lenda fyrir ofbeldi í þeim heimi til dæmis vegna skuldamála og einhverju þvíumlíku og það sama á við um kynferðisbrotin, það er mjög sjaldan sem slíkt kemur inn sem kæra til lögreglu út úr þessum heimi.“



Spurður að því hvers vegna lögreglan hafi ekki handtekið þessa einstaklinga sem fjallað var um í skýrslunni skellir Snorri aftur skuldinni á manneklu og fjárþörf.„Svona rannsóknir, þarna er verið að fjalla um skipulagða brotastarfsemi. Svona rannsóknir taka yfirleitt mjög langan tíma og eru mjög mannfrekar og kostnaðarsamar.“

Þær margborgi sig þó því afraksturinn sé öruggara samfélag fyrir alla. „Það verður að hafa í huga líka að það er eitt að vita og annað að geta sannað. Við búum í réttarríki sem betur fer og það er enginn sekur hér á landi fyrr en hann hefur hlotið dóm.“