Kvöldfréttir Stöðvar 2

Fjöldi baráttusamtaka hyggja á að mótmæla komu Mike Pence, varaforseta bandaríkjanna til landsins. Ákvörðun Katrínar Jakobsdóttur um að sækja norræna verkalýðsráðstefnu í Svíþjóð í stað þess að taka á móti Pence hefur vakið athygli heimsmiðlanna. Sumir miðlanna segja að þetta sé fordæmalaust en Katrín segir þetta ekki með vilja gert.

Fjallað verður nánar um málið í kvöldfréttum Stöðvar 2 klukkan hálf sjö þar sem rætt verður við skipuleggjendur mótmælanna.

Umræðan um launakjör bæjar- og sveitarstjóra er ósanngjörn að mati sviðsstjóra hjá Sambandi íslenskra sveitarfélaga. Miða þurfi laun þeirra við álag og ábyrgð. Sveitarfélögum er í sjálfvald sett hvort þau fari eftir leiðbeinandi reglum sambandsins um launakjör. Fjallað verður nánar um málið í kvöldfréttum.

Þá verður rætt við jarðeðlisfræðing sem telur merki vera um að Katla sé að undirbúa gos. Vísbendingar séu um að eldfjallið sé komið nálægt brotmmörkum. Atvik sem átti sér stað í miðborg Reykjavíkur á hinsegin dögum um síðustu helgi, þegar ung kona var handtekin, er komið inn á borð nefndar um eftirlit með lögreglu. Fjallað var um málið í mannréttindanefnd í dag.

Þá verður farið yfir góð ráð til þátttakenda í Reykjavíkurmaraþoninu og litið við á Fiskideginum litla sem haldinn var á hjúkrunarheimilinu Mörk í dag.

Þetta og margt fleira á samtengdum rásum Stöðvar 2, Bylgjunnar og Vísis klukkan 18:30.