Vinur Pól­stjörnu­manna tekur á sig alla sök og segist plagaður af sam­visku­biti

Þremenningarnir sem ákærðir eru fyrir amfetamínframleiðslu í Borgarfirði neituðu allir sök við aðalmeðferð málsins í Héraðsdómi Reykjavíkur. Íslendingur, sem sendi lögreglu, saksóknara og verjendum bréf þar sem hann lýsti yfir ábyrgð á amfetamínframleiðslunni, hélt frásögn sinni til streitu við aðalmeðferð málsins og segist plagaður af samviskubiti.

Þar sagðist hann einn hafa átt amfetamínframleiðsluna í Borgarfirði og hafa unnið að henni ásamt ónafngreindum Pólverja. Íslendingurinn er vinur þeirra Alvars Óskarssonar og Einars Jökuls Einarssonar sem eru ákærðir fyrir amfetamínframleiðsluna.

Þeir hlutu á sínum tíma þunga dóma í Pólstjörnumálinu. Sá þriðji sem er ákærður fyrir amfetamínframleiðsluna er Margeir Pétur Jóhannsson.

Vinur Alvars og Einars, sem þeir lýstu sem góðum félaga, gaf ekki frekari útskýringu á játningu en að samviskubit hefði nagað hann vegna málsins.

Þremenningarnir gáfu skýrslu hver fyrir sig í gær að kröfu ákæruvaldsins sem vildi með því minnka líkurnar á samræmdum framburði. Allir ákærðu sögðu Íslendinginn sem sendi játningarbréfið bera ábyrgð á framleiðslunni.

Lögreglan og ákæruvaldið telur framburð félagans ekki trúverðugan. Telur ákæruvaldið gögn málsins staðfesta sekt þeirra Alvars, Einars og Margeirs.

Sá sem sendi bréfið og mætti fyrir aðalmeðferðina í gær og lýsti yfir ábyrgð er ekki ákærður í málinu. Hann sagðist hafa mikið samviskubit vegna málsins. Það mun falla í hlut dómara að fella dóm um hvort frásögn hans er trúverðug eða ekki.

Að skýra rangt frá einhverju fyrir rétti getur varðað allt að fjögurra ára fangelsisvist samkvæmt 142. grein almennra hegningarlaga. Er það hlutverk lögreglu að ákveða hvort framburður mannsins verður rannsakaður frekar ef hann verður metinn ótrúverðugur.

Fordæmi eru fyrir því að dæma fólk fyrir rangan vitnisburð hér á landi, einmitt í fíkniefnamálum.

Sagðist hafa verið á tímakaupi að vökva plönturnar

Málið er nokkuð umfangsmikið en það varðar framleiðslu á rúmum átta kílóum af amfetamíni í sumarbústað í Borgarfirði. Málið er í raun tvíþætt því það varðar einnig framleiðslu á 206 kannabisplöntum í Þykkvabæ nærri Hellu. Alvar, Einar Jökull og Margeir voru ákærðir fyrir þá framleiðslu ásamt þremur öðrum.

Einar og Margeir neituðu báðir sök varðandi kannabisræktunina en Alvar játaði minniháttar hlutdeild í þeirri ræktun. Sagðist hann hafa fengið greitt tímakaup fyrir að vökva plönturnar.

Tveir karlmenn og ein kona gengust við ákærunni gegn þeim fyrir ræktun á kannabisplöntunum í síðasta mánuði og fengu skilorðsbundna dóma fyrir.

Framleiðslan var gerð upptæk 7. júní síðastliðinn eftir umfangsmikla aðgerð lögreglunnar. Samkvæmt gögnum málsins hafði rannsókn lögreglu staðið yfir í tæpt hálft ár vegna grunsemda um að Alvar stæði að stórfelldri framleiðslu á fíkniefnum. Einn lögreglumann sem mætti fyrir dóm sagði að við skoðun á bíl Alvars 10. maí síðastliðinn hafi sést svartur bali, sem geymdi vökva, og hrærivélar ásamt öðru. Það hafi verið staðfesting á grun lögreglu að Alvar stæði að stórfelldri fíkniefnaframleiðslu.

Njósnuðu um hina grunuðu í sumarbústaðnum

Dagana fyrir handtökuna hafði lögregla beitt aðferð sem hún kýs að kalla „skyggingu“ þar sem sakborningum er fylgt eftir með leynd. Njósnuðu óeinkennisklæddir lögreglumenn á ómerktum lögreglubílum um sakborninga. Komu lögreglumennirnir sér fyrir á svokölluðum „sjónpóstum“ við sumarbústaðinn þar sem þeir fylgdust með ferðum og athæfi sakborninga.

Til greina kom að setja eftirlitsbúnað í bíl Alvars en lögreglan hætti við það af ótta við að sakborningar myndu leita að eftirfararbúnaði í bílnum og komast þar með að því að lögreglan væri á eftir þeim.

Aðalmeðferðin málsins hófst í gær og stendur enn yfir. Sakborningar og vitni komu fyrir dóminn í gær en lögregla og sérfræðingar í dag. Dómari lagði blátt bann við umfjöllun um framburð þeirra sem kallaðir voru fyrir dóminn. Var það gert til að tryggja að ekki væri hægt að samrýma frásagnir.

Var sakborningum meðal annars gert að yfirgefa dómsal svo þeir gætu ekki samrýmt framburð sinn. Eftir að skýrslutöku lauk var því banni aflétt.

Kallaði eftir upplýsingum um rannsóknaraðferðir lögreglu

Verjendur Alvars, Einars Jökuls og Margeirs voru afar gagnrýnir á rannsókn málsins. Hafa þeir áður gert kröfu um aðgang að dagbókarfærslum lögreglu í málinu en þeirri beiðni hafnaði dómari.

Stefán Karl Kristjánsson, verjandi Alvars, var sérstaklega gagnrýninn á að fá ekki upplýsingar um aðferðir lögreglu við eftirlitið með sakborningum.

Lögreglu er þó ekki skylt að svara spurningum um það. Sagði einn lögreglumaðurinn að ef upplýsingar yrðu veittar um það þá væri slíkum aðferðum sjálfhætt.

Stefán Karl gekk nokkuð langt í spurningum sínum til lögreglumanna sem tóku þátt í aðgerðinni.

Dómari þurfti nokkrum sinnum að biðja Stefán Karl um að fullyrða ekki um aðgerðir lögreglu og beina heldur spurningum til þeirra sem voru mættir fyrir dóminn.

Stefán Karl spurði ítrekað hvaða lögreglumenn hefðu tekið þátt í aðgerðinni og hversu margir. Hann fékk þau svör ekki frá lögreglumönnunum. Stefán Karl tók upp á því að biðja einn lögreglumannanna um að skrifa niður nöfn þeirra lögreglumanna sem tóku þátt í aðgerðinni og afhenda dómara blaðið.

Vildi listann til að fá yfirsýn

Dómarinn tók það ekki mál. Stefán Karl sagðist vilja gera það til að fá yfirsýn yfir hvort að allir þeir lögreglumenn sem tóku þátt í aðgerðinni hefðu verið boðaðir fyrir dóm. Dómarinn sagði honum að taka það upp við saksóknara.

Alvar og Einar Jökull hafa áður hlotið þunga dóma fyrir Pólstjörnumálið svokallaða. Framleiðsla á amfetamíni varðar við 173. grein almennra hegningarlaga. Samkvæmt þeirri grein getur sú framleiðsla varðað allt að tólf ára fangelsisvist.