Bægir lægðunum frá landinu

Rólegheitaveður er í kortunum næstu daga; kalt og heiðskírt. Það skýrist af hæð sem nú er yfir Grænlandi og „bægir lægðum frá landinu“. Sú staða gæti jafnframt haft yfirhöndina bróðurpart vikunnar, að því er segir í hugleiðingum veðurfræðings.

Þá er sérstaklega bent á að á þessum árstíma, þegar léttskýjað er og hægur vindur, er hitatap að næturlagi talsvert mikið. Þannig getur gert allmikið frost. „Einnig eru þetta aðstæður þar sem vart verður við svifryk,“ segir í hugleiðingum veðurfræðings.

Þar segir einnig að það komi að því að áðurnefnd hæð yfir Grænlandi gefi eftir og „lægðirnar finni leiðina til okkar aftur, einhverjum til ama á meðan aðrir gleðjast.“

Veðurhorfur á landinu næstu daga

Á þriðjudag:

Norðaustan 5-10 við suðausturströndina, annars hægari. Víða léttskýjað, en skýjað A-lands. Frost 0 til 8 stig, kaldast í innsveitum.

Á miðvikudag:

Hæg norðaustlæg eða breytileg átt og léttskýjað. Frost 0 til 10 stig, mildast á annesjum.

Á fimmtudag og föstudag:

Vestan gola, bjart veður og kalt, en þykknar upp V-til á landinu. Hiti breytist lítið.

Á laugardag og sunnudag:

Útlit fyrir fremur kalda norðlæga átt með björtu veðri víða um land, síst NA-til.