Fundu ætlað barna­klám á heimili manns sem á­reitti ungar stúlkur

Karlmaður var handtekinn í vikunni, grunaður um kynferðislega áreitni gagnvart nokkrum ungum stúlkum á grunnskólaaldri. Maðurinn hefur verið úrskurðaður í gæsluvarðhald til 3. janúar.

Lögreglunni á Suðurnesjum fór að berast tilkynningar um meint athæfi mannsins um síðustu mánaðamót og voru þær allar á þann veg að maðurinn stöðvaði bifreið sína þar sem ungar stúlkur voru á ferð í nágrenni við grunnskóla sína. Þar hafi hann haft uppi kynferðislega tilburði.

Um er að ræða fjórar stúlkur í þremur málum en stúlkan sem varð síðast fyrir áreitni mannsins gat gefið greinargóða lýsingu á bifreið mannsins. Lögregla hafði upp á honum og við húsleit fannst ætlað barnaklám. Maðurinn neitar sök.

Rannsókn málsins er á viðkvæmu stigi samkvæmt tilkynningu frá lögreglu og er því ekki unnt að veita frekari upplýsingar.