Ings kominn með sextán mörk og Southampton vann án vandræða

Southampton vann öruggan 3-0 útisigur á botnliði Norwich í ensku úrvalsdeildinni í fótbolta í kvöld en þetta var fyrsti leikur beggja liða eftir kórónuveirufaraldurinn.

Danny Ings skoraði fyrsta mark leiksins snemma í seinni hálfleik eftir stutta sendingu frá Stuart Armstrong sem skoraði svo sjálfur skömmu síðar, eftir sendingu frá Ings. Þriðja markið skoraði Nathan Redmond tíu mínútum fyrir leikslok.

Ings hefur nú skorað sextán mörk á leiktíðinni og aðeins þeir Jamie Vardy (19) og Pierre-Emerick Aubameyang (17) hafa gert fleiri. Ings hefur hins vegar ekki skorað neitt þessara marka af vítapunktinum.

Southampton er með 37 stig í 13. sæti, komst upp fyrir Newcastle sem á leik til góða, en Norwich situr sem fastast á botninum með 21 stig, sex stigum frá næsta örugga sæti.