Spáin fyrir Olís-deild kvenna 2020-21: Fleiri lið en bara Fram og Valur í titilbaráttunni (1.-3. sæti)

Ingvi Þór Sæmundsson og Óskar Ófeigur Jónsson skrifa 11. september 2020 11:00

Íþróttadeild Vísis og Stöðvar 2 Sports spáir fyrir um gengi liðanna í Olís-deild kvenna en keppni í deildinni hefst með tveimur leikjum í dag, föstudaginn 11. september.

Í fyrradag skoðuðum við liðin sem verða í botnbaráttunni, í gær litum við á liðin sem við teljum að verði í 4.-6. sæti deildarinnar og í dag er komið að liðunum sem munu berjast um deildarmeistaratitilinn.

Að okkar mati eru Fram, ÍBV og Valur með sterkustu lið deildarinnar, allavega þegar litið er á leikmannahópa þeirra. Fram var með langbesta liðið á síðasta tímabili en virðist ekki jafn sterkt á þessari stundu enda tvær landsliðskonur fjarverandi og óvissa með markvarðamálin.

Eyjakonur hafa bætt við sig tveimur landsliðskonum og stefna hærra en síðustu ár. Þá verða Valskonur sterkar að vanda.

Valur var í 2. sæti Olís-deildar kvenna þegar síðasta tímabil var stöðvað vegna kórónuveirufaraldursins.vísir/bára

Valur í 3. sæti: Fleiri spurningarmerki en síðustu ár

Valur var með langbesta lið landsins tímabilið 2018-19 og vann þrefalt. Á síðasta tímabili tók Fram framúr Val, vann deildarmeistaratitilinn og sigraði Val í undanúrslitum bikarkeppninnar. Valskonur eru þó enn Íslandsmeistarar og eiga þann titil að verja í vetur.

Liðið virðist þó veikara en á síðasta tímabili enda sterkir og reyndir leikmenn horfnir á braut. Hvaða lið sem er myndi finna verulega fyrir því að missa leikmenn á borð við Íris Björk Símonardóttur, Söndru Erlingsdóttur, Díönu Dögg Magnúsdóttur og Írisi Ástu Pétursdóttur.

Til að fylla þessi skörð hefur Valur fengið markvörðinn Sögu Sif Gísladóttur, Selfyssinginn Huldu Dís Þrastardóttur, Þóreyju Önnu Ásgeirsdóttur úr Stjörnunni og þá þreytir Mariam Eradze frumraun sína í efstu deild á Íslandi í vetur.

Saga fær það vanþakkláta verkefni að leysa Írisi Björk af. Undanfarin ár hefur Valur getað treyst á um 45 prósent markvörslu frá henni sem gefur ansi góðan grunn til að byggja á.

Ágúst Jóhannsson er á sínu fjórða tímabili með Val og hann þarf að finna réttu blönduna til að liðið geti slegist við Fram. Valskonur verða góðar en spurningarmerkin eru aðeins fleiri en síðustu ár.

Hversu langt síðan að Valur ...

... varð Íslandsmeistari: 1 ár (2019)
... varð deildarmeistari: 1 ár (2019)
... varð meðal þriggja efstu í deildinni: 0 ár (2020)
... varð bikarmeistari: 1 ár (2019)
... komst í bikarúrslit: 1 ár (2019)
... komst í úrslitakeppni: 1 ár (2019)
... komst í undanúrslit: 1 ár (2019)
... komst í lokaúrslit: 1 ár (2019)
... féll úr deildinni: 64 ár (1956)
... kom upp í deildina: 62 ár (1958)

Gengi Vals í deildarkeppninni undanfarin níu tímabil

2019-20 2. sæti í deildinni
2018-19 Deildarmeistari
2017-18 Deildarmeistari
2016-17 6. sæti í deildinni
2015-16 5. sæti í deildinni
2014-15 6. sæti í deildinni
2013-14 2. sæti í deildinni
2012-13 Deildarmeistari
2011-12 Deildarmeistari

Gengi Vals í úrslitakeppninni undanfarin níu tímabil

2019-20 Úrslitakeppnin fór ekki fram
2018-19 Íslandsmeistari
2017-18 Lokaúrslit (2. sæti)
2016-17 Ekki í úrslitakeppni
2015-16 Átta liða úrslit
2014-15 Átta liða úrslit
2013-14 Íslandsmeistari
2012-13 Undanúrslit
2011-12 Íslandsmeistari

View this post on Instagram

Árið 2019! 2019 var sögulegt ár fyrir félagið þar sem kvenna flokkar félagsins sópuðu til sín titlunum. Árið endaði með því að handboltastelpurnar lentu í 2.sæti í vali íþróttafréttamanna, með jafnmörg stig og körfuboltastelpur félagsins, um lið ársins. Við óskum körfuboltastelpunum innilega til hamingju með útnefninguna og frábæran árangur á árinu! Íris Björk Símonardóttir endaði í 17-18.sæti í vali um íþróttamann ársins og Ágúst Þór Jóhannsson þjálfari kvennaliðs Vals 5-6. sæti í vali um þjálfara árins. Strákarnir í u-18 ára landsliðinu enduðu í 2.sæti á Sparkassen Cup núna rétt fyrir áramót eftir tap gegn Þjóðverjum í úrslitaleik en þar voru 4 Valsarar í eldlínunni. Benedikt Gunnar Óskarsson, Andri Finnsson, Breki Hrafn Valdimarsson og Tómas Sigurðsson. Heimir Ríkarðsson stýrir liðinu. Árið 2019 var frábært ár fyrir félagið okkar en nú horfum við fram á vegin, höldum áfram að skrifa söguna og byggjum ofan á það frábæra starf sem verið er að vinna við Hlíðrenda hverjum degi. Framtíðin er björt! Takk fyrir árið Valsarar!

A post shared by Valurhandbolti (@valurhandbolti) on Dec 31, 2019 at 12:29pm PST

HBStatz tölurnar frá síðasta tímabili

Sóknarleikur Vals 2019/20 í tölum HBStatz

Mörk skoruð í leik - 2. sæti (27,6)
Skotnýting - 2. sæti (57,5%)
Vítanýting - 7. sæti (74,5%)
Hraðaupphlaupsmörk - 3. sæti (62)
Stoðsendingar í leik - 2. sæti (11,7)
Tapaðir boltar í leik - 2. sæti (10,8)

Vörn og markvarsla Vals 2019/20 í tölum HBStatz

Mörk fengin á sig í leik - 1. sæti (21,0)
Hlutfallsmarkvarsla - 1. sæti (42,6%)
Varin víti - 8. sæti (6)
Stolnir boltar - 4. sæti (78)
Varin skot í vörn - 2. sæti (53)
Lögleg stopp í leik - 4. sæti (22,6)

Félagaskiptamarkaðurinn

Komnar:

Hulda Dís Þrastardóttir frá Selfossi
Þórey Anna Ásgeirsdóttir frá Stjörnunni
Mariam Eradze frá Toloun Saint-Cyr Var (Frakklandi)
Saga Sif Gísladóttir frá Haukum

Farnar:

Díana Dögg Magnúsdóttir til Sachsen Zwickau (Þýskalandi)
Íris Björk Símonardóttir hætt
Ólöf María Stefánsdóttir til ÍBV
Sandra Erlingsdóttir til Aalborg (Danmörku)
Íris Ásta Pétursdóttir ólétt
Vigdís Birna Þorsteinsdóttir hætt

Líklegt byrjunarlið

Markvörður: Saga Sif Gísladóttir
Vinstra horn: Ragnhildur Edda Þórðardóttir
Vinstri skytta: Lovísa Thompson
Miðja: Mariam Eradze
Hægri skytta: Þórey Anna Ásgeirsdóttir
Hægra horn: Auður Ester Gestsdóttir
Lína: Arna Sif Pálsdóttir

Lovísa Thompson hefur þrisvar sinnum orðið Íslandsmeistari á ferlinum, tvisvar með Gróttu og einu sinni með Val.vísir/bára

Verður að eiga gott tímabil

Má bjóða ykkur upp á sturlaða staðreynd? Lovísa Thompson er bara tvítug. Þrátt fyrir það hefur hún meðal bestu leikmanna landsins í nokkur ár. Á síðasta tímabili var Lovísa markahæsti leikmaður Olís-deildarinnar ásamt Ragnheiði Júlíusdóttur og sá næststoðsendingahæsti. Og einn besti, ef ekki besti, varnarmaður deildarinnar. Þetta mun væntanlega ekkert breytast í vetur og Valur þarf líka á svona framlagi frá Lovísu að halda á meðan liðið stillir saman strengi sína.

Sunna Jónsdóttir er lykilmaður hjá ÍBV, bæði í vörn og sókn.vísir/bára

ÍBV í 2. sæti: Tvær kanónur breyta landslaginu í Eyjum

Í fyrra kvartaði Sigurður Bragason, þjálfari ÍBV, sáran yfir því að breiddin í kvennahandboltanum væri lítil og allir bestu leikmenn landsins færu í sömu liðin. ÍBV fór þá út á örkina og sótti tvo atvinnumenn; Hrafnhildi Hönnu Þrastardóttur og Birnu Berg Haraldsdóttur. Og það breytir landslaginu í Eyjum umtalsvert.

ÍBV var í 7. sæti Olís-deildarinnar þegar síðasta tímabil var blásið af en er ekkert að fara að enda þar núna. Þetta er lið sem ætlar og hefur getu til að berjast á toppnum.

Útilínan hjá ÍBV er ógnarsterk og með gríðarlega skotógn. Þá eru Eyjakonur eflaust með mestu breidd í stöðu hægri skyttu sem sést hefur hér á landi með þær Birnu Berg, Ástu Björt Júlíusdóttur og Söndru Dís Sigurðardóttur.

Þá eru Sunna Jónsdóttir og Ester Óskarsdóttir framúrskarandi varnarmenn. Í markinu stendur svo Marta Wawrzynkowska sem skilaði ljómandi góðri 36 prósent hlutfallsmarkvörslu á síðasta tímabili. Stærsta spurningarmerkið hjá ÍBV er kannski línustaðan en annars er allt til alls í Eyjum til að gera mjög góða hluti.

Hversu langt síðan að ÍBV ... .

.. varð Íslandsmeistari: 14 ár (2006)
... varð deildarmeistari: 14 ár (2006)
... varð meðal þriggja efstu í deildinni: 1 ár (2019)
... varð bikarmeistari: 16 ár (2004)
... komst í bikarúrslit: 8 ár (2012)
... komst í úrslitakeppni: 1 ár (2019)
... komst í undanúrslit: 1 ár (2019)
... komst í lokaúrslit: 15 ár (2005)
... féll úr deildinni: 13 ár (2007)
... kom upp í deildina: 10 ár (2010)

Gengi ÍBV í deildarkeppninni undanfarin níu tímabil

2019-20 7. sæti í deildinni
2018-19 3. sæti í deildinni
2017-18 3. sæti í deildinni
2016-17 5. sæti í deildinni
2015-16 6. sæti í deildinni
2014-15 4. sæti í deildinni
2013-14 3. sæti í deildinni
2012-13 3. sæti í deildinni
2011-12 3. sæti í deildinni

Gengi ÍBV í úrslitakeppninni undanfarin níu tímabil

2019-20 Úrslitakeppnin fór ekki fram
2018-19 Undanúrslit
2017-18 Undanúrslit
2016-17 Ekki í úrslitakeppni
2015-16 Átta liða úrslit
2014-15 Undanúrslit
2013-14 Undanúrslit
2012-13 Undanúrslit
2011-12 Undanúrslit

View this post on Instagram

Hrafnhildur Hanna Þrastardo ttir til I BV! Hrafnhildur Hanna Þrastardo ttir skrifaði i dag undir 2 a ra samning við I BV. Hrafnhildur Hanna, eða Hanna eins og hu n oft ko lluð, hefur leikið allan sinn feril hja uppeldisfe lagi si nu Selfossi að undanskildu si ðasta ti mabili. Þa so ðlaði hu n um og le k með Bourg-de-Pe age Dro me Handball i fro nsku u rvalsdeildinni. A ti ma si num a I slandi le k hu n við go ðan orðsti r og var einn albesti leikmaður Oli s deildarinnar. Hanna hefur leikið 22 landsleiki fyrir I slands ho nd og skorað i þeim 47 mo rk. Hanna er vel tengd til Vestmannaeyja, en ba ðir foreldrar hennar eru Vestmannaeyingar. Við erum o tru lega a nægð með þessa flottu viðbo t við leikmannaho pinn okkar og hlo kkum til samstarfsins með Ho nnu i Eyjum. Vertu hjartanlega velkomin til Eyja! A fram I BV Alltaf, alls staðar!

A post shared by ÍBV Handbolti (@ibv_handbolti) on Jun 1, 2020 at 6:34am PDT

HBStatz tölurnar frá síðasta tímabili

Sóknarleikur ÍBV 2019/20 í tölum HBStatz

Mörk skoruð í leik - 6. sæti (22,8)
Skotnýting - 5. sæti (49,5%)
Vítanýting - 1. sæti (90,5%)
Hraðaupphlaupsmörk - 5. sæti (44)
Stoðsendingar í leik - 6. sæti (6,8)
Tapaðir boltar í leik - 6. sæti (13,1)

Vörn og markvarsla ÍBV 2019/20 í tölum HBStatz

Mörk fengin á sig í leik - 3. sæti (24,2)
Hlutfallsmarkvarsla - 3. sæti (33,2%)
Varin víti - 3. sæti (12)
Stolnir boltar - 7. sæti (74)
Varin skot í vörn - 2. sæti (53)
Lögleg stopp í leik - 3. sæti (19,9)

Félagaskiptamarkaðurinn

Komnar:

Birna Berg Haraldsdóttir frá Neckarsulmer (Þýskalandi)
Hrafnhildur Hanna Þrastardóttir frá Bourg-de-Péage (Frakklandi)
Ólöf María Stefánsdóttir frá Val

Farnar:

Ksenija Dzaferovic

Líklegt byrjunarlið

Markvörður: Marta Wawrzynkowska
Vinstra horn: Kristrún Ósk Hlynsdóttir
Vinstri skytta: Sunna Jónsdóttir
Miðja: Hrafnhildur Hanna Þrastardóttir
Hægri skytta: Birna Berg Haraldsdóttir
Hægra horn: Sandra Dís Sigurðardóttir
Lína: Bríet Ómarsdóttir

Hrafnhildur Hanna Þrastardóttir í leik Íslands og Frakklands í undankeppni EM.vísir/bára

Verður að eiga gott tímabil

Eftir eitt tímabil í Frakklandi er Hrafnhildur Hanna Þrastardóttir komin aftur til Íslands og heldur sig á suðurlandinu. Í fyrsta sinn leikur hún með öðru íslensku liði en Selfossi og stuðningsmenn ÍBV fá að njóta þess að horfa á hana spila í vetur. Hrafnhildur Hanna skorar og það mikið en hún hefur þrisvar sinnum orðið markahæsti leikmaður efstu deildar. Og það kæmi engum á óvart ef hún bætti fjórða markakóngstitlinum við næsta vor.

Framkonur fagna bikarmeistaratitlinum.vísir/daníel

Fram í 1. sæti: Langbestar í fyrra en þurfa að hafa meira fyrir þessu í vetur

Það eru engin gífuryrði að segja að Fram hafi verið í sérflokki á síðasta tímabili. Liðið varð bikarmeistari eftir stórsigur á KA/Þór og deildarmeistari að auki. Fram vann sautján af átján leikjum sínum í Olís-deild kvenna og var með 194 mörk í plús. Framkonur voru algjörlega miskunnarlausar og gengu milli bols og höfuð á andstæðingnum við hvert tækifæri.

Ýmis teikn eru á lofti un að yfirburðirnir verði ekki svona miklir í vetur. Fyrir það fyrsta eru Karen Knútsdóttir og Þórey Rósa Stefánsdóttir barnshafandi og Hafdís Renötudóttir, sem var með bestu hlutfallsmarkvörsluna í Olís-deildinni á síðasta tímabili, frá vegna höfuðmeiðsla.

Þá hringdu viðvörunarbjöllur eftir sjö marka tap fyrir KA/Þór í Meistarakeppni HSÍ á sunnudaginn. Þar litu deildar- og bikarmeistararnir ekki vel út, hvorki í vörn né sókn.

Ef það er samt einhver þjálfari sem kann að kýtta í götin og finna lausir er það Stefán Arnarson sem er á sínu sjöunda tímabili með lið Fram. Og þótt sterka leikmenn vanti er þetta enn ofboðslega gott, vel mannað og reynt lið og líklegast til afreka. En það verða fleiri lið um hituna en í fyrra.

Hversu langt síðan að Fram ...

... varð Íslandsmeistari: 2 ár (2018)
... varð deildarmeistari: 0 ár (2020)
... varð meðal þriggja efstu í deildinni: 0 ár (2020)
... varð bikarmeistari: 0 ár (2020)
... komst í bikarúrslit: 0 ár (2020)
... komst í úrslitakeppni: 1 ár (2019)
... komst í undanúrslit: 1 ár (2019)
... komst í lokaúrslit: 1 ár (2019)
... féll úr deildinni: Aldrei
... kom upp í deildina: 75 ár (1945)

Gengi Fram í deildarkeppninni undanfarin níu tímabil

2019-20 Deildarmeistari
2018-19 2. sæti í deildinni
2017-18 2. sæti í deildinni
2016-17 2. sæti í deildinni
2015-16 3. sæti í deildinni
2014-15 2. sæti í deildinni
2013-14 4. sæti í deildinni
2012-13 2. sæti í deildinni
2011-12 2. sæti í deildinni

Gengi Fram í úrslitakeppninni undanfarin níu tímabil

2019-20 Úrslitakeppnin fór ekki fram
2018-19 Lokaúrslit (2. sæti)
2017-18 Íslandsmeistari
2016-17 Íslandsmeistari
2015-16 Undanúrslit
2014-15 Undanúrslit
2013-14 Átta liða úrslit
2012-13 Íslandsmeistari
2011-12 Lokaúrslit (2. sæti)

View this post on Instagram

Þriðjudagurinn 16.júní var mikill hátíðisdagur hjá okkur Frömurum. Guðmundur B. Ólafsson formaður HSÍ kom til okkar og afhenti þá bikara sem við höfðum unnið eftir veturinn. Um kvöldið var svo blásið í veglegt lokahóf þar sem einstaklingsverðlaun meistaraflokkana voru veitt. Stelpurnar okkar í meistaraflokki kvenna fengu afhend verðlaun sín en þær eru deildarmeistarar Olís-deildar kvenna árið 2020 en engir Íslandsmeistarar eru krýndir þetta árið. U-lið kvenna sigraði svo Grill66-deildina með miklum yfirburðum og fengu sinn bikar afhentan. Einnig fengum við afhenta við sama tækifæri bikara vegna deildarmeistara karla í 4.karla yngra ár og 4.karla eldra ár. 5.flokkur kvenna eldra ár fékk svo afhend sín verðlaun en þær voru Íslandsmeistarar í sínum aldursflokki. Virkilega vel gert öll og innilega til hamingju með árangurinn. Myndirnar tók Jóhann G. Kristinsson en fleiri myndir má sjá á http://frammyndir.123.is/pictures/

A post shared by Fram handbolti (@framhandbolti) on Jun 19, 2020 at 2:57am PDT

HBStatz tölurnar frá síðasta tímabili

Sóknarleikur Fram 2019/20 í tölum HBStatz

Mörk skoruð í leik - 1. sæti (31,9)
Skotnýting - 1. sæti (63,4%)
Vítanýting - 2. sæti (82,1%)
Hraðaupphlaupsmörk - 1. sæti (114)
Stoðsendingar í leik - 1. sæti (16,7)
Tapaðir boltar í leik - 1. sæti (10,4)

Vörn og markvarsla Fram 2019/20 í tölum HBStatz

Mörk fengin á sig í leik - 2. sæti (21,1)
Hlutfallsmarkvarsla - 2. sæti (39,8%)
Varin víti - 3. sæti (12)
Stolnir boltar - 1. sæti (111)
Varin skot í vörn - 1. sæti (129)
Lögleg stopp í leik - 2. sæti (17,8)

Félagaskiptamarkaðurinn

Komnar:

Guðrún Erla Bjarnadóttir frá Haukum
Ástrós Anna Bender frá Aftureldingu
Karólína Bæhrenz Lárudóttir byrjuð aftur

Farnar:

Heiðrún Dís Magnúsdóttir til Stjörnunnar
Þórey Rósa Stefánsdóttir ólétt
Karen Knútsdóttir ólétt

Líklegt byrjunarlið

Markvörður: Katrín Ósk Magnúsdóttir
Vinstra horn: Perla Ruth Albertsdóttir
Vinstri skytta: Ragnheiður Júlíusdóttir
Miðja: Kristrún Steinþórsdóttir
Hægri skytta: Hildur Þorgeirsdóttir
Hægra horn: Lena Margrét Valdimarsdóttir
Lína: Steinunn Björnsdóttir

Steinunn Björnsdóttir var frábær á síðasta tímabili.vísir/daníel

Verður að eiga gott tímabil

Eflaust móðgast fáir þegar fullyrt er að Steinunn Björnsdóttir hafi verið besti leikmaður síðasta tímabils. Hún er leiðtoginn í Framliðinu, fyrst fram og fyrst aftur, afgerandi á báðum endum vallarins, klúðrar varla skoti og sýnir ótrúlegan stöðugleika. Það er varla hægt að biðja um mikið meira en það og hún býður væntanlega upp á svipaða frammistöðu á komandi tímabili.

Olís-deild kvenna Valur ÍBV Fram