Einhugur um rannsókn á vistheimilum og kallað eftir gögnum

Velferðarnefnd Alþingis er einhuga um að nauðsynlegt sé að rannsaka aðbúnað, þjónustu og meðferð fullorðins fólks með fatlanir, þroskahömlun og geðræn veikindi sem dvalið hefur á stofnunum og meðferðarheimilum á Íslandi. 

Á fundi velferðarnefndar í morgun var ákveðið að leita upplýsinga hjá forsætisráðuneytinu um það hvernig hliðstæðar rannsóknir hafa farið fram, hvaða leiðir séu heppilegastar og hvert umfangið gæti verið miðað við upplýsingar sem kunni að vera til staðar í ráðuneytinu.

Nefndin telur nauðsynlegt að fara í þessa vinnu áður en form og fyrirkomulag verður ákveðið vegna umfangs og eðlis málsins en ljóst er að fjöldi stofnana og meðferðarheimila getur heyrt þar undir. 

Velferðarnefnd hefur gefið forsætisráðuneyti frest til 1. febrúar að skila gögnunum og í framhaldinu verður tekin ákvörðun um form og efni rannsóknarinnar.

Tilefni rannsóknarinnar eru nýlegar fréttir af aðbúnaði vistaðra á heimilinu Arnarholti og í kjölfarið áskoranir Þroskahjálpar og Geðhjálpar til Alþingis um að sett verði á fót rannsóknarnefnd.