Gaf Demókrötum gullið tækifæri

Það er þó ólíklegt að frumvarpið fari í gegnum öldungadeildina, þar sem Repúblikanar eru í meirihluta.

Þeir hafa lýst yfir andstöðu við það að senda tvö þúsund dali til Bandaríkjamanna.

Þetta er liður í neyðarpakka vegna faraldurs nýju kórónuveirunnar sem ætlað er að aðstoða Bandaríkjamenn og eigendur fyrirtækja. Það tók þingmenn marga mánuði að semja um pakkann og Steve Mnuchin, fjármálaráðherra, tók þátt í viðræðunum og sagði að Trump myndi samþykkja frumvarpið.

600 dala ávísanir yrðu sendar til allra Bandaríkjamanna sem þéna minna en 75 þúsund dali á ári og yrðu sendar auka ávísanir til fjölskyldna vegna barna.

Þar að auki fjallar frumvarpið um auknar atvinnuleysisbætur, aðstoð til fyrirtækja og vernd fyrir borgara gagnvart því að vera vísað úr leiguhúsnæði. Frumvarpið kemur einnig að fjárveitingum vegna dreifingar bóluefna og aðstoð til stofnanna, svo eitthvað sé nefnt.

Kom aftan að Repúblikönum

Trump neitaði þó að skrifa undir í nokkra daga þar sem hann sagði frumvarpið skammarlegt. Hann sagðist vilja hærri ávísanir og að hann vildi losna við ákveðna liði sem snúa að mestu að fjárútlátum til þróunaraðstoðar, sem Hvíta húsið hafði áður lagt til.

Þá vissi Trump að Repúblikanar voru andvígir því að hækka upphæðina á þeim ávísunum sem senda á til Bandaríkjamanna.

Forsetinn skrifaði þó óvænt undir á sunnudagskvöld en tók fram að hann myndi krefjast þess að ávísanirnar yrðu hærri og að dregið yrði úr fjárútlátum. Það eru kröfur sem þingið er ekki bundið af og var strax útlit fyrir að þingmenn ætluðu sér ekki að fara eftir þeim.

Þrátt fyrir það greiddu 275 þingmenn atkvæði með því að senda tvö þúsund dala ávísanir til Bandaríkjamanna og 134 á móti. 44 Repúblikanar gengu til liðs við Demókrata. Frumvarpið mun þá fara fyrir öldungadeildina þar sem óljóst er hvort það verði yfir höfuð tekið fyrir.

Demókratar þrýsta á Repúblikana

Samkvæmt frétt Politico eru mjög litlar líkur á því að frumvarpið fari í gegnum öldungadeildina. Trump hefur þó gefið Demókrötum gullið tækifæri til að taka sér stöðu með vinsælu málefni og valda deilum meðal Repúblikana.

Chuck Schumer, leiðtogi Demókrata, sagði á blaðamannafundi í gær að Trump þyrfti að beita öldungadeildarþingmenn Repúblikanaflokksins meiri þrýstingi. Hann þyrfti að ræða við þá og krefjast þess að þeir styðji það að senda Bandaríkjamönnum hærri upphæð.

„Þessir öldungadeildarþingmenn hafa fylgt þér í gegnum súrt og sætt,“ sagði Schumer og beindi hann orðum sínum að forsetanum.

Þingmenn fulltrúadeildarinnar greiddu einnig atkvæði um frumvarp um fjárútlát til varnarmála sem Trump hafði áður beitt neitunarvaldi sínu gegn. Atkvæðagreiðslan fór 322-87 og er það vel yfir þá tvo þriðju þingmanna sem þarf til að komast hjá neitunarvaldi forseta.

Öldungadeildin mun koma saman í dag og er búist við því að þar sé einnig nægur meirihluti svo hægt verið að gera frumvarpið að lögum.

Öldungadeildarþingmaðurinn Bernie Sanders, lýsti því þó yfir í gær, að hann myndi koma í veg fyrir atkvæðagreiðslu um varnarmálafrumvarpið, þar til Mitch McConnell, forseti öldungadeildarinnar myndi leggja frumvarpið um tvö þúsund dala ávísanir til atkvæðagreiðslu.