Guð­­­mundur ösku­illur í leiks­­­lok: „Niðrandi um­­­mæli sem hafa farið illa í hópinn og mig“

Það var ljóst að Guðmundi var mikið niðri fyrir eftir leikinn en hann sendi sömu spekingum einmitt tóninn í gær, daginn fyrir leikinn mikilvæga gegn Frökkum í dag. Hann var þó ánægður með strákana í leik dagsins er hann ræddi við RÚV í leikslok.

„Ég er ofboðslega stoltur af liðinu. Ég hef ekki oft gengið í gegnum svona mót á þennan hátt. Varnarleikurinn hefur verið stórkostlegur. Við höfum tapað þremur leikjum, með tveimur mörkum gegn mjög góðum liðum, en ég er mjög stoltur af liðinu,“ sagði Guðmundur.

„Mér fannst við fara mjög vel í gegnum þennan leik. Bæði varnar- og sóknarlega. Varnarleikurinn var frábær. Það komu kaflar í fyrri hálfleik en löguðum það. Sóknarleikurinn var mjög góður. Ég var ánægður með hraðaupphlaupin. Það var dags skipunin svo ég var ánægður með það.“

Guðmundur beindi sér síðan að stöðunni á liðinu og þeim væntingum sem hefur verið á íslenska liðið til þessa.

„Það er svo furðulegt að upplifa það að fara inn í stórmót og það vantar fyrir fram þrjá lykilleikmenn og raunverulega síðan fjóra í framhaldinu. Þetta er svipað og við værum með norska landsliðið án Sander Sagosen, án Christian O'Sullivan og án Harald Reinkind. Svo bætist enn einn miðjumaður við, þá er ég að tala um Hauk Þrastarson. Þannig förum við inn í mótið en okkur er alltaf ýtt inn í eitthvað hlutverk sem við erum ekki með akkúrat mannskapinn til, til að klára.“

Hann skaut föstum skotum að Arnari Péturssyni og Loga Geirssyni sem hafa verið sérfræðingar RÚV á mótinu.

„Það er algjörlega óþolandi að heyra hvernig sérfræðingar RÚV eru að tjá sig um þetta á niðrandi hátt. Talandi um þetta eftir leikinn á móti Sviss að liðið sé ráðalaust. Þetta eru svo niðrandi ummæli og þetta hefur farið mjög illa í hópinn og mig hvernig þetta hefur verið. Mér finnst þetta ekki eiga rétt á sér. Við skulum aðeins skoða þetta. Staðreyndirnar eru þessar: Það vantar fjóra mjög mikilvæga pósta í liðið fyrirfram, vegna þess að Alexander er nánast kýldur út í leiknum á móti Portúgal.“

Hann sagði marga leikmenn unga og efnilega og það mætti gagnrýna liðið, en sú gagnrýni þyrfti að vera faglega. Honum hafi ekki fundist hún vera það til þessa.

„Það eru þrír leikmenn í liðinu núna að spila sína fyrstu stórkeppni. Það eru þrír leikmenn í þessu liði sem voru í æfingabanni og gátu ekki spilað handbolta í þrjá mánuði. Við þessar aðstæður er ekki þetta einfalt verkefni að koma hingað og ætla sér eitthvað enn meira. Þetta eru bara staðreyndir á borðinu. Mér finnst að það þurfi að vera vitrænni umræða um þetta en ekki verið að tala í einhverjum fyrirsögnum endalaust. Það er algjörlega óásættanlegt. Það er allt í lagi að gagnrýna en hún þarf að vera fagleg og hún þarf að vera sanngjörn. Númer eitt, tvö og þrjú. Þá erum við alveg til í að ræða hlutina. Það hefur mér alls ekki fundist vera.“

Landsliðsþjálfarinn sagði að varnarleikurinn hafi verið mikið á milli tannanna á fólki en þessi sami varnarleikur hafi verið í þróun í þrjú ár og að Guðmundur hlusti ekki á svona blaður.

„Og talandi um ýmsa hérna í mínu liði og veltandi sér upp úr því, það er bara það sem ég sætti mig ekki við. Ég bara verð að segja það að ég ótrúlega stoltur af þessu liði. Ég er ótrúlega stoltur af þessari frammistöðu og hvernig við erum að gera þetta. Það er búið að gagnrýna mig meðal annars af öðrum sérfræðingnum og Loga Geirssyni í þrjú ár fyrir þessa vörn. Ég er búinn að fá að heyra það að þessi vörn sé svona og hinsegin og við þurfum að gera eitthvað annað. Auðvitað hlusta ég ekki á svona blaður. Þessi vörn er búin að vera í þrjú ár í mótun og þannig er vinnan á bakvið þetta og það verða menn fara að skilja. Menn verða að koma og gagnrýna liðið af einhverri sanngirni og viti. Það hefur ekki verið staðan það sem af er þessu móti.“

Fréttin hefur verið uppfærð.