Jazz setti fé­lags­met, Suns sjóðandi, Giannis geggjaður og Kuzma skaut Kings í kaf

Utah Jazz vann 21. heimaleik sinn í röð er liðið lagði Chicago Bulls, 113-106. Phoenix Suns valtaði yfir Oklahoma City Thunder, 140-103, Los Angeles Lakers vann Sacramento Kings 115-94 og Milwaukee Bucks lagði Portland Trail Blazers 127-109.

Þá vann Toronto Raptors sögulegan sigur á Golden State Warriors í nótt. Lokatölur þar 130-77 í hreint út sagt ótrúlegum leik. Meira um það hér að neðan.

Giannis Antetokounmpo reyndist munurinn á Bucks og Trail Blazers í nótt. Gríska undrið skoraði 47 af 127 stigum Bucks í leiknum. Þá tók hann tólf fráköst, átti þrjú blokk og gaf tvær stoðsendingar. Er þetta í annað sinn á leiktíðinni sem hann skorar 47 stig í leik en hann hefur ekki enn skorað meira í einum og sama leiknum.

Giannis skaut 85 prósent af vellinum og er aðeins þriðji leikmaður í sögu NBA-deildarinnar til að skora meira en 45 stig í leik og hitta samt úr 85 prósent skota sinna eða meira.

Milwaukee Bucks unnu á endanum leikinn með 18 stiga mun, 127-109. Jrue Holiday var næst stigahæstur í liði Bucks með 22 stig ásamt því að gefa 10 stoðsendingar. Þar á eftir kom Khris Middleton með 20 stig, átta stoðsendingar og sjö fráköst. Hjá Portland var Damian Lillard með 32 stig ásamt því að gefa fimm stoðsendingar.

Utah Jazz vann sjö stiga sigur á Chicago Bulls, 113-106, og þar með 21. heimaleikinn í röð sem er met á þeim bænum. Sigurinn virtist ætla að verða mun stærri en Bulls beit frá sér í síðasta fjórðung leiksins.

Donovan Mitchell var að venju stigahæstur hjá Utah með 26 stig. Rudy Gobert skoraði 19 ásamt því að taka 13 fráköst. Hjá Bulls var Theddeus Young stigahæstur með 25 stig.

Phoenix Suns vann 37 stiga sigur á Oklahoma City Thunder. Leikurinn var svo gott sem búinn í fyrsta leikhluta en Suns vann hann með 30 stiga mun. Lokatölur á endanum 140-103.

Devin Booker skoraði 32 stig fyrir Suns á meðan gamla brýnið Chris Paul skoraði 17 stig og gaf 17 stoðsendingar. Théo Maledon í liði OKC var hins vegar stigahæstur allra á vellinum með 33 stig.

Los Angeles Lakers eru nú á ferðalagi þar sem þeir leika sjö útileiki í röð. Þeir hófu ferðalagið á sigri en meistararnir lögðu Sacramento Kings með 21 stigs mun í nótt, lokatölur 115-94.

Kyle Kuzma var frábær í liði Lakers og skoraði 30 stig. Þar á eftir kom Dennis Schröder með 17 stig og átta stoðsendingar. Hinn tvítugi Talen Horton-Tucker splæsti svo í 14 stig á þeim 22 mínútum sem hann spilaði.

Hjá Kings var Harrison Barnes stigahæstur.

Önnur úrslit í nótt

New York Knicks 86-99 Dallas Mavericks

Boston Celtics 118-102 Houston Rockets

Indiana Pacers 97-114 Charlotte Hornets

Memphis Grizzlies 120-108 Minnesota Timberwolves

New Orleans Pelicans 103-126 Atalanta Hawks

Hér má finna stöðuna í deildinni. Brooklyn Nets eru sem fyrr á toppi Austurdeildarinnar á meðan Giannis og félagar eru í 3. sæti. Í Vesturdeildinni eru Jazz sem fyrr á toppnum, Suns í 2. sæti á meðan Los Angeles-liðin koma þar á eftir.