Banda­ríkja­menn fengu hjálp frá Dönum við njósnir

Meðal þeirra sem NSA njósnaði um voru kanslari Þýska­lands, Angela Merkel, og for­seti landsins Frank-Walter Stein­meier en hann var utan­ríkis­ráð­herra þegar njósnirnar fóru fram. Einnig var njósnað um Peer Stein­brück sem var á þessum tíma kanslara­efni þýska flokksins SPD.

Njósnir NSA komust fyrst upp árið 2013 en nú fyrst hefur verið greint frá þætti dönsku leyni­þjónustunnar í málinu. Heimildar­menn innan dönsku leyni­þjónustunnar láku upp­lýsingunum til fjölmiðla.

Frétt frá 2013:

Vissu af öllum símasamskiptum

Njósnunum var þá ekki að­eins beint að þýskum stjórn­mála­mönnum heldur einnig norskum, sænskum og frönskum ráða­mönnum.

Sam­kvæmt skýrslunni fóru njósnirnar fram í gegn um sam­skipta­kerfi Dan­merkur. Þannig gátu danska leyni­þjónustan og NSA nálgast bæði sím­töl og SMS sem fóru í gegn um dönsk kerfi.

Danski ríki­smiðillinn segir að enn hafi ekki tekist að fá svör um hversu marga NSA njósnaði um ná­kvæm­lega með þessum hætti. Sam­kvæmt heimildar­manni miðilsins voru það þó stjórn­mála­menn sem leyni­þjónustur hefðu „al­mennt á­huga á“, til dæmis for­sætis- og utan­ríkis­ráð­herrar.

For­seti Þýska­lands, Stein­meier, hefur kallað málið hneyksli og gagn­rýnt það að Danir hafi njósnað um grann­ríki sín. Angela Merkel hefur enn ekki tjáð sig um málið en tals­maður ríkis­stjórnarinnar segir að hún hafi verið upplýst um það.

Sam­kvæmt frétt danska miðilsins hefur ríkis­stjórn Dan­merkur haft vit­neskju um sam­starf leyni­þjónustunnar við Banda­ríkja­menn að minnsta kosti frá því að skýrslan var gerð árið 2015. Dönsk yfir­völd neyddu þá alla yfir­menn leyni­þjónustunnar til að láta af störfum í fyrra vegna málsins.