Kristinn fram­lengir til ársins 2023

Kristinn er uppalinn hjá Blikum og byrjaði ungur að spila með meistaraflokki liðsins. Hann var hluti af liðinu sem varð bikarmeistari árið 2009 og Íslandsmeistari ári síðar. Eitthvað sem félagið er að reyna endurtaka nú ellefu árum síðar.

Sem stendur er Breiðablik einu stigi á eftir Val og Víking sem tróna á toppi Pepsi Max deildarinnar. Blikar eiga hins vegar leik til góða.

Eftir að hafa leikið sem atvinnumaður í bæði Svíþjóð og Bandaríkjunum samdi Kristinn við FH árið 2018. Samningur hans rann út eftir sumarið 2019 og í kjölfarið samdi hann loks við uppeldisfélagið á nýjan leik.

Hann fór í gegnum endurnýjun lífdaga á síðustu leiktíð þar sem hann skoraði alls átta mörk í 14 leikjum í deild og bikar. Hann hefur skorað fimm mörk í 17 leikjum í Pepsi Max deildinni það sem af er sumri ásamt því að skora í 2-1 sigrinum á Austria Vín í Sambandsdeild Evrópu.

Alls hefur Kristinn leikið 181 leik fyrir Breiðablik og skorað í þeim 58 mörk.

Kristinn Steindórsson er ekki eini leikmaðurinn sem hefur framlengt samning sinn á Kópavogsvelli en miðvörðurinn Viktor Örn Margeirsson gerði slíkt hið sama á dögunum.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.