Gæslan bjargar fjórum skipverjum eftir strand við Æðey

Stjórnstöð Landhelgisgæslunnar barst tilkynning um strandið laust eftir miðnætti, að því er fram kemur í tilkynningu. Áhöfnin á TF-GRO var kölluð út og sjóbjörgunarsveitir Landsbjargar á Vestfjörðum.

Þá óskaði stjórnstöð Gæslunnar eftir því að áhöfn rannsóknarskipsins Bjarna Sæmundssonar héldi á svæðið en skipið var statt í Ísafjarðardjúpi. 

Bjarni Sæmundsson og björgunarskipið Kobbi Láka voru fyrst á vettvang. Enginn leki kom að skútunni við strandið en veður var ekki gott. Þó fór ágætlega um skipverjana á meðan þeir biðu, að því er fram kemur í tilkynningunni.

Um kl. 2.15 voru þeir allir komnir um borð í þyrluna og gengu hífingar vel en voru krefjandi vegna masturs skútunnar. Aðstæður á vettvangi verða kannaðar við birtingu og flóð nú í morgunsárið.

Uppfært 10:25: Í tilkynningu frá Landhelgisgæslunni segir að þegar komið hafi verið að skútunni í morgun hafi hún verið komin aftur á flot. Hún gangi nú fyrir eigin vélarafli og sigli til Ísafjarðar í fylgd sjómælingaskipsins Baldurs og björgunarskipsins Kobba Láka.