Valsmenn hafa kunnað ótrúlega vel við sig á heimavelli frændliðs þeirra í Hafnarfirðinum og sigurgangan telur nú orðið rúmlega þrjú ár á Íslandsmótinu í handbolta.
Tvö efstu lið deildarinnar mætast á Ásvöllum en hefst leikurinn klukkan 19.30 og verður sýndur beint á Stöð 2 Sport. Haukar eru með tveggja stiga forskot á Val en Valsmenn eiga leik inni og komast hvort sem er í efsta sætið á innbyrðis viðureignum með sigri í kvöld.
Leikmenn Valsliðsins ættu að eiga mjög góðar minningar frá Ásvöllum en þeir urðu Íslandsmeistarar á gólfinu þar 18. júní síðastliðinn og svo bikarmeistarar á sama stað 2. október.
Valsliðið vann Hauka 34-29 þegar þeir tryggðu sér Íslandsmeistaratitilinn en unnu aftur á móti Framara í bikarúrslitaleiknum.
Sigurinn á Haukum á Ásvöllum í seinni úrslitaleik Íslandsmótsins í vor var enn fremur þriðji sigurleikur Vals í röð á móti Haukum á Ásvöllum.
Haukar hafa ekki unnið heimaleik á móti Val á Íslandsmótinu í 43 mánuði eða síðan þeir unnu 29-19 sigur á Valsmönnum í úrslitakeppninni 2018. Síðasti heimasigur Hauka á Val í deildarkeppninni kom aftur á móti 23. nóvember 2016 eða fyrir næstum því fimm árum síðan.
Haukar unnu samt bikarleik liðanna á Ásvöllum sem fór fram 21. nóvember 2018 en það er síðasti tapleikur Hlíðarendapilta í íþróttahúsinu á Ásvöllum.
- Síðustu deildarleikir Valsmanna á Ásvöllum
- (Úrslitakeppni ekki tekin með)
- 2. október 2020: Valur vann með þremur mörkum (28-25)
- 9. febrúar 2020: Valur vann með sex mörkum (32-26)
- 6. apríl 2019: Valur vann með þremur mörkum (26-23)
- 21. mars 2018: Valur vann með sjö mörkum (29-22)
- 23. nóvember 2016: Haukar unnu með fimm mörkum (34-29)
