N1 Raf­magn endur­greiðir við­skipta­vinum fyrir mis­mun á taxta frá upp­hafi

Stjórnendur N1 hafa verið gagnrýndir fyrir að rukka fólk, sem kom í viðskipti í gegn um áðurnefnda þrautavaraleið, mun hærri taxta en fyrirtækið hefur auglýst og boðið öðrum viðskiptavinum. 

Fyrirtækið tilkynnti í janúar að það hygðist breyta til og selja alla raforku á sama verðtaxta til heimila frá og með 1. janúar 2022 auk þess sem viðskiptavinir fyrirtækisins fengju endurgreiddan mismun á uppgefnum taxta og þrautavarataxta frá 1. nóvember síðastliðnum. Nú hefur þó verið ákveðið að endurgreiða mismuninn frá upphafi. 

Þegar hafði verið tilkynnt að endurgreitt yrði fyrir mismuninn á tímabilinu 1. nóvember 2021 til 31. desember 2021 en nú munu viðskiptavinir fá endurgreiðslu fyrir tímabilið 1. mars til 31 október 2021. Fram kemur í tilkynningu frá N1 að heildarupphæðin geti numið allt að 40 milljónum króna. 

„Það hefur verið ósk N1 Rafmagns að finna sanngjarna niðurstöðu í máli félagsins sem söluaðili til þrautavara, hratt og örugglega. Leitað var til Orkustofnunar, sem hefur umsjón og eftirlit með þrautavaraleiðinni, um leiðsögn hvað það varðar,“ segir í tilkynningunni.

„Þar sem Orkustofnun hefur ekki enn birt félaginu niðurstöður sínar eða gefið svör við þeim spurningum sem lúta að stöðu N1 Rafmagns sem orkusali til þrautavara, þykir nauðsynlegt að koma til móts við þrautavaraviðskiptavini félagsins eins fljótt og kostur er með endurgreiðslu á uppgefnu tímabili.“

Kalla eftir því að stjórnvöld setji skýrari reglur

Þá segir að allir viðskiptavinir sem komi í gegn um þrautavaraleið muni færast á lægsta taxta félagsins hér eftir. N1 Rafmagn var fyrsta sölufyrirtækið til að sinna hlutverki orkusala til þrautavaraleiðar stjórnvalda. 

Í tilkynningunni segir að frá byrjun hafi reynst erfitt að átta sig á umfangi og kostnaði sem fylgdi því að afla orku fyrir þennan hóp viðskiptavina og því hafi þurft að kaupa dýrari raforku á skammtímamarkaði til að mæta eftirspurninni. Í mars 2021 hfi félagið brugðið á það ráð að hækka þrautavarataxta í samræmi við verð á skammtímamarkaði og túlkun N1 Rafmgans á reglugerð um sölufyrirtæki til þrautavara. 

„Frá því að N1 Rafmagn var fyrst valið sölufyrirtæki til þrautavara, hefur meðalverð á skammtímamarkaði hækkað um 75%. Frjáls raforkumarkaður fyrir neytendur er enn að mótast eins og ljóst er af því að íslenskir neytendur skipta síður um raforkufyrirtæki en neytendur í löndum sem við berum okkur saman við,“ er haft eftir Hinriki Erni Bjarnasyni, framkvæmdastjóra N1 í tilkynningunni. 

Hann segir fyrirtækið hafa gert mistök, sem það axli ábyrgð á og muni læra af. Þá kallar N1 eftir því frá stjórnvöldum að reglugerð varðandi þrautavaraleið verði skýrð enn frekar og endurskoðuð sem fyrst með það að markmiði að fleiri neytendur velji sér orkusala sjálfir með upplýstari og gagnsærri hætti en nú er og mistök sem þessi endurtaki sig ekki.