„Við viljum bara hefna fyrir þann leik“

Framkonur eiga harma að hefna eftir að hafa tapað á móti KA/Þór í síðasta bikarúrslitaleik sem fór fram síðastliðið haust.

„Það er ólýsanlegt að fá að vera með í þessu og það eru í raun smá forréttindi að fá að taka þátt í þessum leikjum. Við ætlum að byggja upp með það að njóta,“ sagði Hildur Þorgeirsdóttir.

Henry Birgir Gunnarsson ræddi við hana og forvitnaðist um það hvort liðið gerði eitthvað sérstakt eða öðruvísi fyrir svona leiki.

„Eftir að fyrirkomulaginu var breytt og að þetta séu tveir leikir þá er það massíft að spila á fimmtudegi og strax aftur á laugardegi. Það er því ekki pláss fyrir eitthvað mikið aukalega en reynum að setja á mikinn fókus og það er mikil stemmning á æfingum. Svo erum við með einhvern mat saman eða eitthvað slíkt,“ sagði Hildur.

Fram mætir KA/Þór en þessi lið hafa spilað marga stóra leiki á síðustu árum.

„Þessi leikur leggst bara mjög vel í mig og okkur. Þessir leikir okkar hafa farið á báða vegu. Þær hafa unnið okkur í vetur og við þær. Þær tóku okkur síðast í úrslitaleik í bikar fyrir áramót,“ sagði Hildur og það er komið að stund hefndarinnar.

„Við viljum bara hefna fyrir þann leik en þær eru gífurlega sterkar og með góðan hóp,“ sagði Hildur en hvað þarf að ganga upp hjá Fram til að þær vinni þennan leik og komist í bikarúrslitin.

„Við þurfum að ná upp góðum varnarleik og setjum aðalfókusinn okkar á það. Þá kemur markvarslan og í kjölfarið fáum við þessi auðveldu mörk með hraðaupphlaupum. Það er svona okkar upplegg. Þetta týpíska Fram-upplegg,“ sagði Hildur. Það má sjá allt viðtalið við hana hér fyrir ofan.

Leikur Fram og KA/Þór hefst klukkan 18.00 á Ásvöllum í Hafnarfirði.