Spá „alvöru sunnan stormi“ á mánudag

Í dag er spáð sunnanátt, fimm til þrettán metrar á sekúndu, með éljum en norðaustan- og austanlands léttir til þegar líður á daginn og má gera ráð fyrir björtu og fallegu veðri, að því er kemur fram í hugleiðingum veðurfræðings. Hiti um og yfir frostmarki.

Á morgun má síðan gera ráð fyrir hægari suðlægri átt með stöku éljum sunnan- og vestanlands en bjartir kaflar á milli. Á Norðurlandi og Austurlandi verður síðan þurrt og léttskýjað þar sem hiti verður nálægt frostmarki. Blíðviðrið stendur þó stutt yfir.

„Á mánudag er síðan spáð alvöru sunnan stormi. Slydda í fyrstu, en síðan talsverð rigning og hlýnar í veðri. Rigningar- og leysingarvatn gæti valdið vandræðum og er um að gera að vera á varðbergi gagnvart því,“ segir í hugleiðingum veðurfræðings.

Veðurhorfur á landinu næstu daga:

Á mánudag:

Gengur í suðaustan og sunnan 20-28 m/s. Slydda í fyrstu, síðar talsverð rigning. Úrkomuminna um landið norðaustanvert. Hlýnandi, hiti 3 til 9 stig síðdegis. Snýst í suðvestan hvassviðri vestanlands um kvöldið með skúrum eða slydduéljum.

Á þriðjudag:

Allhvöss eða hvöss suðvestanátt og él, en bjartviðri norðaustantil á landinu. Kólnar í veðri, vægt frost seinnipartinn.

Á miðvikudag:

Ákveðin suðlæg átt með éljum, en áfram þurrt norðaustanlands. Hiti um og undir frostmarki. Bætir í vind og úrkomu um kvöldið.

Á fimmtudag og föstudag:

Suðvestanátt og éljagangur, en bjart að mestu um landið norðaustanvert. Frost víða 0 til 4 stig.