Fjöldi flóttamanna frá Úkraínu á við alla íbúa Króatíu

Talsmaður Vladimirs Putins forseta Rússlands gerði í dag lítið úr væntingum um frið eftir fund ríkjanna í Tyrklandi í gær. Ekkert annað hefði gerst en Úkraínumenn hefðu loks komið kröfum sínum á blað. Þeirra á meðal væri að teknar verði upp tvíhliða viðræður milli Rússlands og Úkraínu um framtíð Krímskaga sem væri óaðskiljanlegur hluti Rússlands samkvæmt stjórnarskrá.

Þá sagði Putin í dag að eina leiðin til að stöðva loftárásir á Mariupol og koma íbúum þar til aðstoðar væri að úkraínskir hermenn í borginni gæfust upp. Þar eru enn um hundrað þúsund manns innkróaðar og sæta stanslausum árásum.

Alex Mundt skipuleggjandi frá Flóttamannahjálp Sameinuðu þjóðanna segir að fjöldi flóttamanna til nágrannaríkja vestan við landamærin haldi áfram að slá öll met.

„Í dag fór fjöldinn yfir fjórar milljónir. Það finnst mér vera dapurlegur áfangi. Það þýðir að á um mánuði hafa fjórar milljónir manna verið rifnar upp með rótum frá heimilum sínum, fjölskyldum og samfélagi í hraðasta flótta fólks á okkar tímum,“ segir Mundt.

Antony Blinken utanríkisráðherra Bandaríkjanna og fleiri hafa varað við því að trúa yfirlýsingum Rússa um að þeir ætli að draga úr árásum á borgir í norður Úkraínu. Það er greinilegt að flóttafólk sem kom til Póllands í dag treysti þessum yfirlýsingum ekki heldur, eins og ungi maðurinn Nikolay Nazarov sem flúði með veikan föður sinn frá Kharkiv í norðausturhluta Úkraínu.

„Ég efast um að hægt sé að trúa því sem Rússar segja. Ég held að átökin eigi enn eftir að magnast í austurhlut landsins. Þess vegan getum við ekki snúið aftur til Kharkiv. Við óttumst nýjan þátt í stríðinu,“ sagði Nazarov þar sem hann ýttu föður sínum áfram í hjólastól.

Líklegast er talið að Rússsar hafi kallað hluta uppgefinna hersveita sinna heim áður en þeir senda nýjar sveitir til árása í Úkraínu. Sergiy Kyslytsya sendiherra Úkraínu hjá Sameinuðu þjóðunum segir Rússa hafa misst mikinn fjölda flugvéla, skriðdreka og annarra hertóla og um 17 þúsund Rússar hafi fallið í stríðinu.

„Ég vil upplýsa ykkur um að afvopnun Rússa sem framkvæmd er af úkraínska hernum með aðstoð allrar þjóðarinnar er langt á veg komin,“ sagði sendiherrann og sneri því yfirlýstum markmiðum Rússa um að afvopna úkraínska herinn við.