Segja þetta vera sjóliða flaggskipsins Moskvu

Á myndunum má sjá stóran hóp sjóliða í hafnarborginni Sevastopol á Krímskaga. Þar heilsa þeir yfirmanni rússneska flotans, Nikolay Yevmenov.

Staðfest hefur verið að Moskva hafi sokkið í Svartahafi í síðustu viku. Rússar segja sjálfir að kviknað hafi í skipinu.

Úkraínumenn segja hins vegar að skipið hafi sokkið eftir vel heppnaða árás úkraínska hersins. Bandaríkjamenn telja síðari útgáfuna vera líklegri skýringu.

Ekkert hefur frést af áhöfn skipsins, þangað til nú. Rússar hafa sagt að þeir hafi verið fluttir frá borði en Úkraínumenn telja víst að mannfall hafi orðið í árásinni. Úkraínumenn halda því jafn framt fram að skipherra skipsins, Anton Kuprin, hafi látist í árásinni. Þetta hefur þó ekki verið staðfest.

Reikna má með að myndirnar af sjóliðunum sem Rússar hafa birt séu liður í áróðursstríði sem geisar samhliða átökunum í Úkraínu.

Sjá má hátt í tvö hundruð sjóliða auk þess sem að rætt er við aðmírálinn Yevmenov sem segir að áhöfnin muni áfram störfum sínum og skyldum fyrir rússneska flotann. Um 510 eru í áhöfn skipsins.