Skin og skúrir á skrautlegum sunnudegi í NFL-deildinni

Cincinnati Bengals fór í Super Bowl á síðustu leiktíð og er búist við miklu af liðinu. Ekki er hægt að segja það sama um Pittsburgh Steelers sem er í uppbyggingarfasa.

Það kom því verulega á óvart að Steelers skildi ná að vinna í framlengdum leik sem bauð upp á endalausa dramatík. Sigursparkið kom í lok framlengingar en Steelers tryggði sér framlengingu með því að verja spark frá Bengals fyrir aukastigi. Það gerist nánast aldrei.

Sigurinn var þó ekki áfallalaus fyrir Steelers sem missti besta varnarmann deildarinnar, TJ Watt, af velli vegna meiðsla og tímabili hans gæti verið lokið.

Það var gjörsamlega allt á floti í Chicago þar sem Bears tók á móti San Francisco 49ers. Heimamenn kunnu betur á aðstæður og lönduðu óvæntum og sætum sigri.

Miami er eitt af mest spennandi liðum deildarinnar í vetur og liðið bauð upp á flotta frammistöðu í fyrsta leik. Þá skellti liðið New England Patriots á sannfærandi hátt. Höfrungarnir eru með góða sókn en vörnin sló í gegn í þessum leik og liðið lítur vel út.

Patrick Mahomes og félagar í Kansas City Chiefs voru eitt af spurningamerkjum vetrarins enda meðal annars misst sinn besta útherja, Tyreek Hill. Hans var alls ekkert saknað í gær er Höfðingjarnir gjörsamlega slátruðu Arizona. Mahomes kastaði fyrir fimm snertimörkum og hefur sjaldan litið betur út.

LA Chargers og Las Vegas Raiders ætla sér stóra hluti í vetur enda bæði komin með mjög sterkt lið. Margir biðu því spenntir eftir leik þeirra í gær. Það var aftur á móti Justin Herbert, leikstjórnandi Chargers, sem stal senunni og hann dró sitt lið að landi.

Það eru svo að verða valdaskipti í norðurriðli Þjóðadeildarinnar því Minnesota fór illa með Green Bay Packers í gær og brestirnir í liði Packers leyndu sér ekki.

Tom Brady fór svo illa með Dallas í Dallas í nótt. Buccaneers með frábært lið og mun fara langt aftur á þessari leiktíð ef allt verður eðlilegt.

Erfitt tap fyrir Dallas og til að bæta gráu ofan á svart þá meiddist leikstjórnandi liðsins, Dak Prescott, og verður frá í nokkrar vikur.

Úrslit helgarinnar:

• Atlanta-New Orleans 26-27
• Carolina-Cleveland 24-26
• Chicago-San Francisco 19-10
• Cincinnati-Pittsburgh 20-23
• Detroit-Philadelphia 35-38
• Houston-Indianapolis 20-20
• Miami-New England 20-7
• NY Jets-Baltimore 9-24
• Washington-Jacksonville 28-22
• Tennessee-NY Giants 20-21
• Arizona-Kansas City 21-44
• LA Chargers-Las Vegas 24-19
• Minnesota-Green Bay 23-7
• Dallas-Tampa Bay 3-19

Í nótt:

Seattle - Denver