Ali­cante-farar fá engar bætur eftir að Play flaug með leigu­flug­vél í stað Air­bus

Þetta kemur fram í ákvörðun Samgöngustofu í málinu. Þar segir að kvörtun hafi borist stofnuninni í júlí síðasta sumar frá fjórum viðskiptavinum Play sem flugu til Alicante þann 14. júlí.

Í ákvörðuninni má sjá að í svörum Play komi fram að flugfélagið bjóði einungis upp á eitt almennt farrými, en að farþegar geti valið sæti á ákveðnum stað í vélinni gegn greiðslu. Flugfélagið hafi daginn eftir flugið, eftir kvörtun frá viðskiptavinunum, endurgreitt kostnað vegna sætavals auk þess að bjóða þeim betri sæti í næstu flugferð þeirra með flugfélaginu.

Fram kemur að töf hafi orðið á afhendingu á síðustu flugvél Play umræddan dag sem gerði það að verkum að nauðsynlegt hafi verið að fá leiguflugvél inn í skamman tíma. Kvartendur hafi svo flogið út með leiguflugvélinni.

Töldu sig hafa borgað fyrir að fljúga í Airbus

Í svörum viðskiptavinanna segir þeir telji sig hafa borgað fullt gjald fyrir flugferð með Airbus-vél frá Play en hins vegar fengið flug með Fly2sky sem hafi ekki verið valið.

„Ég hefði þá flogið með Icelandair því valið stóð þar á milli en ég vildi prófa að fljúga með Play. Við vorum komin um borð á útleið þegar við komumst að því að þetta var leiguvél og gátum ekki aðhafst neitt í því.

Ég spurðist svo fyrir varðandi heimferðina því ég vildi ekki fara aftur með þessu flugfélagi og fékk þá póst daginn fyrir heimferð að það yrði nýjasta vélin þeirra. Sama dag eða um 6 klt fyrir brottför fæ ég póst um að það sé aftur Fly2sky og ekki nýja vélin. Ég gat ekki aðhafst neitt í því á þeim tímapunkti heldur,“ segir í svarinu.

Kröfu um skaðabætur hafnað

Viðskiptavinirnir segjast vilja halda því til haga að þeir skilji vel að fyrirtæki lendi í vandræðum og verði að grípa til ráðstafana. En þau verði þá að koma til móts við viðskiptavini og endurgreiða að hluta til verð vörunnar sem ekki stóðst væntingar. 

„Í grunninn er þetta bara að ég keypti eitt en fékk annað sem ég tel ekki sambærilegt,“ segir í svari fjölskyldunnar.

Með vísun í reglugerð um réttindi flugfarþega, loftferðalaga og samningsskilmála Play taldi Samgöngustofa hins vegar að ekki yrði séð að umrædd breyting á loftfari geti talist niðurfærsla á farrými. 

Kröfu fjölskyldunnar um skaðabætur úr hendi Play var því hafnað.